Виталий Мирний: Андижондаги каби мухлисларни бошқа ҳеч қаерда кўрмаганман, аммо олти ой маошсиз тўп суриш...

Ўтган мавсумда “Андижон” шарафини ҳимоя қилган украиналик дарвозабон Виталий Мирний бу йил Украинанинг таниқли клубларидан бири – “Черноморец” сафига қўшилди. Шуни алоҳида айтиш жоизки, Мирний ўтган вақт давомида андижонлик мухлисларнинг севимли футболчиларидан бирига айланганди. Бунинг устига ўз позициясида ҳам анча ишончли ўйинлари орқали андижонликларнинг меҳрини қозонганди. Албатта, ушбу дарвозабоннинг кетиши клуб учун катта йўқотиш бўлди. Тажрибали дарвозабон бўлгани сабабли ҳам уни “Черноморец” ўз сафига чорлади. Ҳозиргача андижонликлар Мирнийни эслаб туришади. Биз эса куни кеча Виталий билан боғланиб, интервью олдик. Ўзаро суҳбат давомида украиналик дарвозабон нима сабабдан “Андижон”дан кетганини, ҳозирги фаолияти, андижонлик ишқибозларнинг меҳри ва яна бошқа масалаларда ўз фикрларини билдирди.  

- Салом Виталий, ишларингиз яхшими? “Андижон”ни тарк этиб, “Черноморец”га ўтишингизга ким ёки нима сабаб бўлди?

- Менинг кетишимга ойлик маошимизнинг олти ойга кечикиши сабаб бўлди. Бундан ташқари, клуб раҳбарияти билан ўртамиздаги муносабатимиз мақтаса арзигулик даражада эмасди.

- Умуман, янги жамоангиздаги ишларингиз қандай?

- “Черноморец” – Украинадаги топ-клублардан бири. Бундай жамоадан таклиф тушар экан, уни рад этиш жуда амримаҳол. Бундай хоҳиш менда ҳам мустасно эмас. Бу ердаги ишларим жойида. Ҳаммаси юқори савияда десам ҳам хато қилмаган бўлардим. Бахтга қарши карантин туфайли чемпионатимиз номаълум муддатга тўхтатиб қўйилган. Аммо, умид қиламизки, ҳаммаси тез орада изига тушади.

- Виталий, “Андижон”даги фаолиятингиз давомида мухлисларнинг ишончини қозонгандингиз. Шу боис маҳаллий ишқибозлар сизни ҳали ҳам унутишгани йўқ...

- Бундай гапларни эшитиш жуда ёқимли. Бунинг учун “Андижон” жамоасининг жонкуяр мухлисларидан жуда миннатдорман. Тўғрисини айтсам, бундай даражада ўзимни қўллаб-қувватлашларини илгари ҳеч қаерда кўрмаганман.

- “Андижон”да бирга ўйнаган футболчилардан кимлар биландир алоқа сақланиб қолганми?

- Унчалик эмас. Фақат айрим жамоадошларимнинг телефон рақамларини билишим мумкин.

- “Андижон”нинг собиқ бош мураббийи Александр Хомяков билан муносабатингиз қандай эди? Боиси ўтган мавсумда у билан ўртангизда қандайдир келишмовчилик бўлганлиги ҳақида эшитгандик.

- У билан ишчи муносабатда эдик. Хомяков жуда яхши мутахассис. Муносабатимиз яхши эди. Шунчаки, у клубда жуда мураккаб вазият юз берган пайтда пайдо бўлди. Шунга қарамасдан жамоа мавсумни 10-ўринда якунлашга эришди.

- Умуман олганда, “Андижон” клубида қолиш имкониятингиз ҳам бормиди?

- Ҳа, жон деб қолган бўлардим. Бунинг устига маошим ҳам яхши эди. Аммо ярим йил маошсиз тўп суриш жуда ҳам оғир. Яна такрорлайман: мени жуда яхши қўллаб-қувватлаганликлари учун андижонлик ишқибозларга миннатдорчилигимни етказиб қўйинг. Лекин клуб раҳбарияти ҳақида бундай дейишим даргумон.

- Ўзбек клубларидан ҳам сизга таклиф бўлганмиди?

- Ҳа, бир клубдан аниқ таклиф бўлди. Аммо “Черноморец”ни тарк этиш ниятим йўқлиги учун рад жавобини беришимга тўғри келди. Қолаверса, бутунлай ўзга мамлакатда пулсиз мураккаб шароитда қолиш жонимга текканди. Уйга, оилам ёнига қайтишни жуда ҳам истадим.

- Сир бўлмаса, қайси жамоадан таклиф тушганди?

- Кечирасиз, бу саволингизга жавоб бера олмайман. Чунки ўртамизда буни ошкор этмаслик борасида келишув бор. Келишувни бузиш эса яхши эмас. Фақат шуни айтишим мумкинки, менга таклиф билан чиққан жамоа нуфузли эди. Уларга панд бериб қўйишни истамаган бўлардим.

- “Андижон” клубининг фанатларини соғиняпсизми?

- Ҳа, албатта. Боя айтганимдек, фаолиятим давомида худди андижонлик мухлислардек мени бошқа бирор-бир клубда шундай қўллаб-қувватлашмаган. Ўзимга қолса, “Андижон”да яна ўйнайверардим. Бироқ олти ой давомида маошсиз тўп суриш жуда мураккаб. Яна шуни қўшимча қилишим керакки, ҳозирга қадар ўша олти ойлик маошимни менга ҳали тўлашгани йўқ. Ўзингиз тасаввур қилинг, оилалик, фарзанди бор ўйинчининг пулсиз шунча вақт яшаши жуда ҳам қийин. Шундай шароитда ҳам биз майдонда охиригача курашдик. Клуб фанатларига панд бериб қўйишни истамадик. Юқорида айтганимдек, андижонлик мухлислар жуда жонкуяр ва фидойи. Уларни умрбод ёдимдан чиқармайман. Агар клуб мутасаддилари ҳам худди ишқибозлар каби бўлганидами, ҳеч қаерга кетмаган бўлардим.

- Биламизки, ўз вақтида “Нефтчи”да ҳам фаолият олиб боргансиз. Аммо “Андижон”даги ўйинларингиздан фарқли равишда у ердаги фаолиятингиз кўнгилдагидек кечмаганди. Бунинг сабаби нимада бўлган?

- “Нефтчи”да ҳам барчаси яхши эди. Жамоа президенти самимий, яхши инсон эди. У ҳар бир футболчига илиқ муносабатда бўларди. Лекин, афсуски, бундай ҳолат атиги икки ой давом этди холос. Шундай бўлса ҳам клуб президентига, ўша жамоада ишлаганлардан миннатдорман. Адашмасам, “Нефтчи”дан кетганимдан кейин клуб раҳбари ҳам кетибди. Бу инсонни жуда ҳурмат қилардим.

- Айтинг-чи, юртимиздаги фаолиятингиз давомида қайси ўйин сиз учун унутилмас бўлиб қолган?

- Ооо, “Навбаҳор”нинг майдонидаги 1:1 ҳисобида тугаган ўйин! Ўша беллашувда стадиондаги муҳит супер даражада бўлган. Бундай шароитда тўп суришнинг гашти бўлакча бўлади. Шунингдек, маҳаллий мухлислар ўз суюклиларини зўр бериб қўллаётган пайтда бундай жамоага қарши тўп суриш ўта қийин кечади. Фурсати келганда айтишим керакки, Андижондан ҳам бизни қўллаш учун ортимиздан жуда кўп ишқибозлар етиб келишганди. Майдонда ҳақиқий жанг кетган десам муболаға бўлмайди. Бундай ўйинлар хотирангизда бир умрга сақланиб қолади.

- Яна қачондир Ўзбекистонга қайтишингиз мумкинми?

- Ҳа, бу эҳтимолдан ҳоли эмас. Агар яхши, ўз олдига юқори мақсадларни қўядиган клубдан таклиф келиб тушса ўйлаб кўришга тайёрман. Қолаверса, Ўзбекистонда менга ҳаммаси жуда ёқиб қолганди. Бундан ташқари, маҳаллий аҳоли ҳам мени жуда яхши қабул қилишганди. Агар бунинг имкони бўлса, албатта яна Ўзбекистонга қайтаман.

- Умуман олганда, чемпионатимиз сизда қандай таассурот қолдирган?

- Чемпионатингизнинг савияси чакки эмас. Клублар таркибида маҳоратли футболчилар етарлича. Аммо сизларда ёзда жуда ҳам иссиқ бўлар экан.

- Кимни энг кучли дарвозабон деб кўрсата оласиз?

- Шахсан менда Ўткир Юсупов яхши таассурот қолдирди.