Хаби Алонсо шармандали мағлубиятга қандай муносабат билдирди?

Мадриднинг “Реал” жамоаси Испания чемпионатининг 15-турида ўз мухлислари кўз ўнгида Ла Лиганинг ўртамиёна клубларидан ҳисобланган “Сельта”га 0:2 ҳисобида ютқазиб қўйди.

Учрашув қаҳрамони захирадан ўйинга қўшилиб иккита гол урган Виллиот Сведберг бўлди. “Реал” ўйинчиларидан уч нафари – Фран Гарсия, Альваро Карререс ва Эндрик (захира ўриндиғида) қизил карточка олди.

Мағлубиятдан кейин мезбонлар бош мураббийи Хаби Алонсо ўз фикрларини билдирди.

- Бу баҳсда умуман бошқа натижани кутгандик ва бундан ғазабдамиз. Эдер Милитаонинг жароҳат олгани вазиятни мураккаблаштириб юборди. Бизга кўп жиҳатларда интенсивлик етишмади.

Энди буларнинг барчасини тезроқ унутиб, олдинга интилиш керак. Бугун уч очко йўқотдик, лекин олдинда ҳали ўйинлар кўп, - деди Хаби Алонсо.

Бу мағлубиятдан кейин “Реал” чемпионлик курашида ашаддий рақиб – “Барселона”дан энди жами тўрт очкога ортда қолмоқда.