Халқаро Олимпия қўмитаси Инфантинога нисбатан текширув очди

Халқаро Олимпия қўмитаси ФИФА президенти Жанни Инфантинога нисбатан текширув бошлайди. Бунга унинг АҚШ президенти Дональд Трамп ташаббуси билан ўтказилган Тинчлик кенгашининг таъсис йиғилишидаги иштироки сабаб бўлган.

The Athletic'нинг ёзишича, Инфантино 19 февраль куни Вашингтондаги тадбирда сиёсатчилар билан бирга, шунингдек, Трампнинг президентлик муддатига ишора қилувчи "АҚШ" ёзуви ва "45-47" рақамлари туширилган қизил кепкада пайдо бўлган. Ушбу имо-ишора ХОҚ аъзосининг хатти-ҳаракатлари Олимпия хартияси тамойилларига мос келиши ҳақида мунозараларга сабаб бўлди.

ХОҚ президенти Кирсти Ковентри вазият ўрганиб чиқилишини маълум қилди.

"Мен воқеалар марказида ХОҚ аъзоси борлигини билмасдим. Энди эътиборимизни шунга қаратганингиздан сўнг, яна қайтамиз ва вазиятни кўриб чиқамиз. ХОҚнинг Олимпия хартияси ўз аъзоларидан нимани кутаётганини жуда аниқ белгилайди. Ҳужжатларни имзолаш эҳтимоли бўйича текширув ўтказамиз.

Ўйлайманки, ХОҚ нуқтаи назаридан биз бундан кейин ҳам сиёсий бетараф бўлиб қоламиз. Бу биз учун ташкилот сифатида спорт майдонида адолатни таъминлашнинг ягона йўлидир. Келажакда ҳам айнан шундай ҳаракат қилишда давом этамиз", - дея Ковентрининг сўзларини келтиради манба.

ХОҚ анъанавий равишда ўз аъзоларининг сиёсий бетарафлиги тамойилини таъкидлайди ва таъсирчан сиёсий контекстга эга тадбирларда ҳар қандай оммавий иштирок Олимпия хартиясига мувофиқлик нуқтаи назаридан кўриб чиқилиши мумкин.