"Xorazm" bosh murabbiyi final oldidan: "Odil Junior"da "qasdimiz bor!"

Xabaringiz bor, ayni damda O‘zbekiston U14 chempionati davom etmoqda. Kuni kecha finalchilar nomi ma’lum bo‘ldi. Birinchi yarim final bahsida "Paxtakor" ustidan g‘alaba qozongan "Xorazm" ustozi Abror Qilichev bilan suhbat qurdik.

- "Paxtakor" klubi ustidan g‘alaba qozonish qanday hissiyotlarni taqdim etdi?

- Bu biz uchun faxr. O‘zbekistondagi eng kuchli jamoa "Paxtakor"ni mag‘lubiyatga uchratish hammaga ham emas. Ayniqsa, turnirning yarim finalida ularni engib, finalga yo‘l olishning o‘zi ulkan baxt. Men bugun shogirdlarim ko‘rsatgan o‘yin bilan faxrlanaman. Ular oxirigacha kurash olib bordi va kuchli ishtiyoq evaziga finalga yo‘l oldik.

- Shogirdlaringizni finalga chiqishini turnir avvalida kutgan edingizmi?

- Albatta. Sababi, O‘zbekistondagi barcha jamoa bilan o‘ynasa bo‘ladi. Agar o‘yin to‘g‘ri yo‘lga qo‘yilsa, futbolchilar o‘z kuchiga ishongan bo‘lsa, shuning o‘zi kifoya. Bizning asosiy maqsadimiz o‘smirlar terma jamoasi bosh murabbiyiga yaxshi kadrlar etkazib berish. Ular terma jamoada to‘p tepsa, men uchun bundan ortiq baxt yo‘q.

- Tarkibdagi yosh futbolchilarning selektsiyasi bilan kim shug‘ullangan?

- Barchasi "Xorazm" futbol mahorat maktabi tarbiyalanuvchilari. Ularni yig‘maganmiz, hammasi o‘zimizning shogirdlar. Bularning barchasini kichik yoshligidan boshlab tarbiyalanganmiz. Maktabimizdagi barcha murabbiylarning mehnati singgan bu yoshlarga.

- "Xorazm" jamoasi yosh futbolchilari bilan butun turnir davomida suhbatlashdim, birga futbol o‘ynadim. Qizig‘i shundaki, shogirdlaringiz biroz tortinchoq, ammo o‘yin chog‘ida ular jipslashib kuchli futbol namoyish etmoqda.

- Mashg‘ulotlar chog‘ida birinchi navbatda mehnatdan qochmaslikka o‘rgatamiz. Bundan tashqari, xorazmlik yigitlar irodali bo‘ladi. Biz ulardagi bu xislatni rivojlantirish maqsadida ancha mehnat qilganmiz. Ko‘rdingiz, deyarli barcha o‘yinda xarakter namoyish etib g‘alaba qozondik. Buni ortida barcha murabbiylarimizning mehnati yotibdi.

- "Xorazm" jamoasiga turnir davomida omad keldi, desak bo‘ladimi?

- Bo‘ladi, ammo omad kuchlilarga kulib boqadi. Bizni favoritlar qatoriga qo‘shishmagani ham balki foydamizga ishlagandir. Har holda, har bir o‘yin biz uchun finalga teng bo‘ldi. Shogirdlarim turnir davomida o‘sib bormoqda. Nasib qilsa, finalda eng yaxshi o‘yinimizni namoyish etmoqchimiz.

- Finaldagi raqib haqida qanday fikrdasiz?

- "Odil Junior"ni finalga chiqishiga shubham yo‘q edi va shunday ham bo‘ldi. Raqib kuchli, ammo biz g‘alaba qozonamiz. Ularda "qasdimiz bor". Avvalgi mag‘lubiyat alamini olish maqsadida bor kuchimiz bilan harakat qilamiz. Maqsadimiz kubok bilan ortga qaytish.