Хотиржам, ёрқин ва мукаммалга яқин терма жамоа. "Евро-2024" ғолиби бўлиш учун улар асосий фаворит

Айни дамда футбол мухлисларининг диққати Германияда давом этаётган Европа чемпионатига қаратилган десак муболаға бўлмайди. Кўпчилик Гарет Саутгейт бошчилигидаги Англиянинг ғалати иштироки-ю, Италиянинг драматик ўйинини мухокама қилаётган бир паллада эътиборингизни бошқа жиҳатга қаратмоқчиман. Яъни,бугунги таҳлил эътибори билан бироз четда қолаётган ёки ҳаддан зиёд мукаммал ўйин кўрсатаётган Испания термаси ҳақида бўлади.

"Қизил Фурия" азалдан қайси ҳолатда ва қандай таркибда бўлишидан қатъи назар доимо етакчилар сафида кўрилади. Бунга етарлича сабаблар бор. Биринчидан, испанларни катта турнирларга доимо юқори савиядаги мураббий тайёрлаган. Мисол учун, Луис Энрике, Висенте дель Боске каби мутахассислар шулар жумласидандир.

Иккинчидан, хар қайси турнирда таркибдаги тажриба ва ёшлик уйғунлиги балансда бўлган. Бу сафарги турнир ҳам бундан мустасно эмас. 39 ёшли қария Хесус Навас ёнида тажрибали ва жамоа сардори Альваро Мората,  Дани Карвахаль,  Родри сингари номлар бор. 
     
Яна бир жихати, Европа чемпионатлари тарихида энг кўп чемпион бўлган 2 жамоадан бири айнан Испания саналади. Илк чемпионлик кўҳна 1964 йилда қўлга киритилган бўлса, кейингилари терма жамоанинг “олтин авлод”и даврида кетма-кет 2 марта(2008-2012- йилларда) нишонланган. Ҳозир ўша таркибдан хеч ким қолмаган бўлса-да, улар ўз номларини тарихда қолдира олишган.



Турнир бошланишидан аввал таркибдаги бирор-бир футболчи индивидуал жиҳатдан порлашини эмас, балки терма жамоани яҳлит бир механизм сифатида кўришимиз хақиқатга яқинроқ ходиса бўлади, деб айтгандим. Амалда хам мана шундай бўлиб чиқмоқда. Ҳали бирор учрашувда бутун жамоа ёмон ўйнаб турган жойида бир футболчи чиқиб, ўйинни қутқариб кетганини кўрмадим. Ўтган 3 тур мобайнида майдонда бир-бирини тушуниб ҳаракат қилиш борасида ҳам муаммо кузатилмади. Жамоадаги ички муҳит аъло даражада, наздимда. Бу эса табиийки натижаларга ҳам таъсир қилади.
 

Жамоа сифатида аҳил, кучли ижрочиларига эга термадан мухлислар ҳам натижа кутса бўлади. Гарчи, мусобақа сеткаси нафақат “Қизил Фурия”, балки аксар грандлар учун анча ноқулай тушганига қарамасдан, “корридо ватани” вакиллари камида ярим финалга қадар етиб бора олади. Кўпи билан эса бу жамоадан мен айни ҳолатда чемпионликни кутяпман.



Ҳуллас, воқеалар ривожини кўришда ва кузатишда давом этамиз. Биз билдирган фикрлар қанчалик ўзини оқлаши вақт ҳукмига ҳавола! 



 

Ҳумоюнмирзо Эргашев мақоласи