Яна асосий таркибга қайтган Олег Зотеев ўйин ҳақида қандай фикрда?

Миллий терма жамоамизнинг Фаластин устидан қозонилган ғалабаси албатта ишқибозларни мамнун этди. Ўша беллашувда мураббийлар асосий таркибда айрим ўзгаришларга қўл уришди. Масалан, жароҳатидан фориғ бўлган ҳужумкор ҳимоячи Олег Зотеев яна асосий таркибга қайтгани эътиборга молик бўлди. Охирги пайтларда эса у захирада қолганди ва бунга сабаб унинг жароҳати билан боғлиқ эди. Аммо Фаластинга қарши баҳсда Зотеев тўлиқ ўйнади. Биз эса унга айрим саволлар билан мурожаат қилдик.

- Ўйиндан олган таассуротларингиз қандай бўлди?

- Биринчи навбатда барча мухлисларимизни ғалаба билан табриклайман. Ўтган турда ўз майдонимизда Саудия Арабистонига ютқазиб қўйганимиздан кейин руҳий босимга тушиб қолгандик. Лекин ўшанда кутилмаган мағлубиятга учрагандик. Лекин биз Фаластин билан ўйинга яхши тайёрлана олдик. Мураббийлар штаби футболчиларни ҳар томонлама руҳлантира олишди. Энг асосийси, биз ғалаба қозондик. Ўйлайманки, сифатли футбол кўрсатдик. Фаластинга эса ҳеч қандай имконият қолдирмадик.

- Саудия билан учрашувда захирада қолгандингиз. Фаластинга қарши беллашувда эса бош мураббий сизни асосий таркибда майдонга туширди. Буни кутганмидингиз?

- Асосий таркибда майдонга тушишимни кутгандим. Фақат бунгача бир ой мобайнида даволангандим. Шу боис ўзим ҳам ҳали тўлиқ спорт формасига кириб улгурмагандим. Албатта, вақтим келишини кутдим ва мураббий менга ҳам ишонч билдирди. Умид қиламанки, мураббийларнинг ишончини оқлай олдим.

- Ўйиннинг охирларида жамоамиз жисмонан чарчаб қолганлиги билинди. Бунга қандай қарайсиз?

- Ҳар қандай жамоа 90 дақиқа ичида прессинг қилаверса чарчайди. Айтмоқчиманки, Фаластинга қарши учрашувнинг охирги дақиқаларида футболчилар чарчаб қолишгани йўқ. Шунчаки, олдинга югурмасдан тўпни кўпроқ ўзимизда назорат қилиб туришни истагандик. Мана, Саудия билан ўйинда кўрдингиз, охирги етти дақиқа ичида нималар бўлганини. Мураббийларимиз ҳам ўйинни назорат қилишимизни айтганди. Биз эса беллашув охирларида ҳам тўпни назорат қилишни истадик. Муҳими, натижа бор.

- Саудияга ютқазганимиздан кейин барча футболчиларда руҳий тушкунлик бўлиб қолганди. Фаластин билан баҳсгача ўша руҳий тушкунликдан чиқиб кетиш қийин кечмадими?

- Йўқ, қийин бўлмади. Чунки барча йигитлар вазиятни тўғри тушуниб тургандилар. Агар Фаластинни ютмаганимизда аҳвол мураккаблашиб кетарди. Албатта, Саудияга ютқазганимиздан кейин ўша куни ва эртасига кайфиятсиз юрдик. Кейин эса ўзимизга келдик. Мураббийлар руҳлантиришди. Фаластинни ютмасак ўзимизга кела олмаслигимизни билдик. Биз учун орқага йўл йўқ эди. Руҳий жиҳатдан ҳам яхши тайёрлангандик.

- Кўпчилик келаси йилнинг ёз фаслида Саудияда бўладиган ўйин гуруҳда ким 1-ўринни эгаллашини ҳал қилиб беришини айтишмоқда. Сиз ҳам бу фикрга қўшиласизми?

- Кўпчиликда ва футболчиларда ҳам шунақа фикр бор. Қаранг, Саудия Арабистони бунгача Фаластин ва Яман билан дуранг ўйнади. Биз эса сафарда Фаластинга ютқаздик. Энди очко йўқотмаслигимиз керак. Ўша ўйингача ҳам барча учрашувларда ютишимиз шарт. Биз эса табиийки Саудияга ҳам фақат ғалаба учун борамиз ва ишонаманки, буни амалда бажара оламиз. Ҳаммаси ўзимизга боғлиқ. Абрамов ҳам термага яқинда келди ва янги жамоа тузиляпти. Мураббий бошқача тактикани қўллаяпти. Олдин терма жамоамиз кўпроқ орқароқда ўйнаганди. Энди эса ҳужумкорликка кўпроқ эътибор бериляпти. Аммо 90 дақиқа давомида ҳужумда ўйнаш ҳам қийин. Исталган терма жамоа бундай ўйнаши оғир. Ҳаттоки, жаҳон чемпион бўлган Франция ҳам энди ҳимояга асосланган ҳолда ўйнаяпти. Биз эса ҳужумкор ўйин кўрсатишга ҳаракат қиляпмиз. Ҳаммасига вақт керак.