Яна сотилмай қолди. "Тоттенхэм"нинг трансфери барбод бўлди

«Тоттенхэм» ҳужумчиси Ришарлисон ҳозирча ватанига қайтмаётгандек кўринади. Лондон клуби «Васко да Гама»дан тушган трансфер таклифини қабул қилгани айтилмоқда, аммо келишув охирги пайтда бекор бўлди. 

Сабаби — футболчининг ўзи Рио-де-Жанейродан жой олган клуб билан шартнома шартлари бўйича келиша олмади, дея хабар бермоқда журналист Аласдер Голд. Бразилияда трансфер ойнаси бу кечқурун ёпилади.

Аввалроқ Ришарлисон «Тоттенхэм» билан тузган шартномасини бекор қилиб, эркин агент сифатида янги жамоа излаши мумкинлиги ҳақида маълумотлар пайдо бўлган эди. 29 ёшли футболчи Премьер-лига ўйинлари учун жамоа рўйхатига киритилмаган. 

Шунингдек, ҳужумчи асосий таркиб билан умумий машғулотларда ҳам иштирок этмаётгани маълум қилинган.