Ютқазган бош мураббийнинг бошини ёриб қўйишди

КОНКАКАФ Миллатлар лигаси чорак финал учрашуви Мексика терма жамоаси учун том маънода омадсиз келди.

Мексикаликлар сафар учрашувида Гондурас билан куч синашиб, ўйинда 0:2 ҳисобида мағлубиятга учради. Мезбонлар вакили Луис Пальма дублга эришиб, жамоаси ғалабасини таъминлади.

Учрашув давомида Мексика терма жамоаси бош мураббийи Хавьер Агирренинг боши ёритилди. Трибунадан отилган буюм меҳмон жамоа мураббийининг бошига тегди. Ўйиндан кейин Агирре ҳолат бўйича фикрини билдирди.

- Ҳеч нарса қилмайди, бу футбол. Гондурас ғалабага лойиқ эди, улар айрим ҳолатларда биздан устун бўлди. Уларни табриклашдан ва ўзимнинг жамоам руҳиятини кўтаришдан бошқа чора йўқ.

Бўлган нохуш вазият ўйлашга ҳам арзимайди, чунки бу футбол, мен шикоят қиладиганлардан эмасман, - деди Хавьер Агирре.

Шунга қарамай, Мексика футбол федерация юз берган ҳолат бўйича мусобақа ташкилотчиси КОНКАКАФдан зудлик билан чора кўришни талаб қилди.