«Ювентус» дарвозабон позицияси учун Лунин ёки Трубинни сотиб олиши мумкин

«Ювентус» янги дарвозабон излашни давом эттирмоқда ва номзодлар рўйхатига украиналик посбонлар Андрей Лунин ҳамда Анатолий Трубинни киритди, деб хабар бермоқда La Gazzetta dello Sport нашри.

Ҳозирча туринликлар учун асосий вариант сифатида «Парма»нинг 23 ёшли дарвозабони Дзион Судзуки кўрилмоқда. «Ювентус» япониялик футболчини камида бир мавсумга ижарага олишга тайёр. Бироқ мавжуд маълумотларга кўра, Судзуки «ПСЖ»га ўтишга жуда яқин турибди.

Агар Судзуки бўйича келишув амалга ошмай қолса, италияликлар эътиборини Лунинига қаратиши мумкин. «Реал» дарвозабони жамоадаги ҳозирги ҳолатидан мамнун, аммо майдонга кўпроқ тушиш имкониятига эга бўлишни истайди. Шу боис «Ювентус»дан тушадиган аниқ таклиф уни жиддий ўйлантириши мумкин.

Трубин ҳам туринликлар тузган кенгайтирилган рўйхатдан жой олган. У 2023 йилдан буён «Бенфика» шарафини ҳимоя қилмоқда. Шунга қарамай, ҳозирча Лунин «Ювентус» учун устувор номзод сифатида кўрилмоқда.

«Ювентус» бош мураббийи Лучано Спаллетти эса янги асосий дарвозабонни айнан шу ҳафта ичидаёқ жамоага қўшиб олишни истамоқда.