"Barsa"ga argentinalik yulduz kerak
Tarkibga juda mos tushadi
«Barselona» qishki transfer oynasida «Manchester Yunayted» markaziy himoyachisi Lisandro Martinesni olib kelish imkoniyatini ko‘rib chiqmoqda, deb xabar bermoqda TEAMtalk nashri.
Nashr ma’lumotlariga ko‘ra, kataloniyaliklar 28 yoshli argentinalik futbolchining transferga chiqishi bo‘yicha allaqachon dastlabki ma’lumotlarni so‘rab ulgurgan. Martinesning o‘zi esa «Manchester Yunayted» rahbariyatiga yozda jamoani tark etishga yoki undan ham ertaroq transferga rozi ekanini bildirgan.
Himoyachining amaldagi shartnomasi mavsum yakunida tugaydi. Shu bilan birga, «Manchester Yunayted» bitimni yana bir yilga uzaytirish huquqiga ega. Ushbu bandni ishga tushirish orqali klub futbolchining kelajagi va uning transfer qiymati ustidan nazoratni saqlab qolishi mumkin.
«Barselona» hozirda chap tomonda o‘ynaydigan tajribali markaziy himoyachi izlamoqda. Lisandro Martines bu borada «Inter» futbolchisi Alessandro Bastoniga nisbatan moliyaviy jihatdan ancha maqbul variant sifatida ko‘rilmoqda. Shu bilan birga, kataloniyaliklarning qishki transferlar bo‘yicha rejalari tarkibda bo‘sh o‘rin paydo bo‘lishi va moliyaviy imkoniyatlarga, jumladan, Ronald Arauxoning ehtimoliy ketishiga ham bog‘liq bo‘ladi.
Izohlar (0)