De Yongning «Barselona»dagi kelajagi so‘roq ostida
«Barselona» Frenki de Yongning jarohatdan keyingi o‘yin daqiqalariga qarab, qishki transfer oynasida uni sotish yoki qoldirishni ko‘rib chiqmoqda.
«Barselona» yarim himoyachisi Frenki de Yongning kelajagi jarohatidan tiklanib, jamoada qanday o‘rin egallashiga bog‘liq bo‘ladi. Bu haqida SPORT.es ma’lumotiga tayanib Sports.kz xabar berdi.
29 yoshli niderlandiyalik futbolchi o‘ng tizzasining ichki yon boylami uzilganidan so‘ng umumiy guruh mashg‘ulotlariga qaytdi. U klub shifokorlari jarrohlik amaliyotini tavsiya qilganiga qaramay, konservativ davolanish usulini tanlagan. Tiklanishning dastlabki natijalari ijobiy, biroq Hans-Diter Flik futbolchi to‘liq sog‘ayib ketmaguncha maydonga tushmasligini bildirgan.
De Yong qaytgandan keyin asosiy tarkibdan joy olish uchun jiddiy raqobatga duch keladi. Rodri, Mark Bernal, Pedri va Fermin mavsumni muvaffaqiyatli boshladi. Shuningdek, Dani Olmo, Gavi va Brayan Farin’yas ham maydonda ko‘proq vaqt o‘tkazish uchun kurashmoqda.
«Barselona» rahbariyati qishki transfer oynasiga qadar niderlandiyalik futbolchining maydonda o‘tkazayotgan daqiqalarini diqqat bilan kuzatmoqchi. Uning yuqori maoshi va boshqa klublar qiziqishini hisobga olganda, jamoadan ketishi ham mumkin bo‘lgan variantlar qatorida qolmoqda.
De Yongning vaziyatini «Chelsi» ham kuzatib bormoqda. Londonliklar Enzo Fernandezni «Manchester Siti»ga sotgan. Biroq de Yongning o‘zi «Barselona»da qolishni istamoqda va Flikni jamoa uchun muhim futbolchi ekaniga ishontirishga umid qilmoqda.
Izohlar (0)