Dzyudochilarimiz Kontinental Liganing "Sharq" divizioni g‘olibi bo‘ldi

Rossiyaning Tyumen shahrida dzyudo bo‘yicha klublar o‘rtasidagi Kontinental Liga musobaqasining "Sharq" divizioni bahslari o‘tkazildi. 

Musobaqaning uchinchi bosqich doirasidagi ushbu divizionning A guruhida Liganing o‘tgan yilgi chempioni "Ural-Zapadnaya Sibir", "Rodina" (ikkalasi – Ekaterinburg), "Tyumen-dzyudo 2", V guruhida esa "Jenys" (Qozog‘iston), "Tyumen-dzyudo" va "Triumf" (Barnaul) klublari bahslarga kirishishdi. 

Guruhning barcha uchrashuvlarida g‘alaba qozongan "Jenys" 1/2 finalda "Ural-Zapad Sibir" jamoasini 3:2 hisobida dog‘da qoldirdi. Ikkinchi 1/2 finalda "Tyumen-dzyudo" xuddi shu hisobda "Rodina" jamoasidan ustun keldi. Hal qiluvchi final uchrashuvida "Jenys" "Tyumen-dzyudo"ni 3:1 hisobida taslim etdi.  

Chempion "Jenys"ning g‘alabalariga terma jamoamiz a’zolari Artyom Shturbabin, Shahram Ahadov va Parij-2024 Olimpiadasi sovrindori Muzaffarbek To‘raboev o‘z hissasini qo‘shdi. Kontinental Liganing final bosqich turniri 1 noyabr kuni Moskva shahrida o‘tkaziladi.

Bu haqda O‘zbekiston dzyudo federatsiyasi matbuot xizmati xabar bermoqda.