EChL. "San Siro"dagi kambek, 6 ta gol urgan "Atletiko" va qiyin ahvolga tushib qolgan "Barselona"

  • 8 noyabr, 2023, 06:31
  • Suhrob Xolbekov
  • 0
  • Futbol
TIGGO 2 PRO

Chempionlar ligasining 4-tur bahslari start oldi. 4 ta guruhdan o‘rin olgan jamoalar ishtirokidagi o‘yinlar o‘z nihoyasiga etib bo‘ldi. Quyida ushbu turda sodir bo‘lgan voqealar va guruhlardagi vaziyatlar bilan tanishing. 

"E" guruhi

"Latsio" "Feyenoord" bahsi italiyaliklarning 1:0 hisobidagi g‘alabasi bilan tugadi. Mehmonlarda ham bir qancha imkoniyatlar bo‘lishiga qaramay, Provedel darvozasi ishg‘ol qilinmadi va posbon eng ko‘p ball to‘plagan futbolchilardan biriga aylandi. Golni esa 45+1 daqiqada Immobile urdi. 3 ochkoni qo‘lga kiritgan Sarri shogirdlari guruhda 2-o‘ringa chiqib oldi. "Feyenoord" esa 3-pog‘onaga tushib ketdi. Ikkinchi o‘yinda "Atletiko" "Seltik"ni ayab o‘tirgani yo‘q. Shotlandiyadagi bahsda jamoalar jangovar durangga imzo chekkandi. Bu safar "matraschilar" naq 6 ta gol bilan mehmonlarni siyladi. Grizmann va Morata dubl qilgan bo‘lsa, Lino va Saul bir martadan o‘z nomini tabloga yozdirib qo‘ydi. 4-turdan keyin "Atletiko" guruh peshqadami bo‘lib turibdi.

photo_2023-11-08_06-06-36

"F" guruhi

"O‘lim" guruhida vaziyat ancha chigallashib ketdi. PSJni yirik hisobda taslim qilgan "Nyukasl" "Borussiya" maydoniga safar uyushtirib, 2:0 hisobida mag‘lub bo‘ldi. Fyullkrug 26-daqiqada jamoasining ajoyib kombinatsiyasini golga aylantirdi. 79-daqiqada esa Brant qarshi hujumdan unumli foydalandi. Ushbu to‘qnashuvda "asalarilar" ko‘p jabhada ustunlik qildi va haqli g‘alabani qo‘lga kiritib, guruhda birinchi o‘ringa chiqib oldi. "Nyukasl" bo‘lsa 4-o‘ringa tushib ketdi. Turning markaziy uchrashuvida esa hisobni parijliklar ochishga muvaffaq bo‘ldi. 9-daqiqada Shkrinyar boshi bilan Menyan darvozasiga gol urdi. Ammo buyog‘iga mezbonlar o‘ziga kelib oldi va 12-daqiqada Leau chiroyli goli bilan imkoniyatlarni tenglashtirib qo‘ydi. Shuningdek, portugal o‘yin davomida ham ajoyib harakatlari bilan ajralib turdi. 50-daqiqaga kelib Jiru qanotdan Teo uzatgan to‘pni boshi bilan darvozaga to‘g‘irlab yubordi. Bu g‘alaba goli edi. Shu tariqa, "Milan" 3, PSJ 2-o‘ringa joylashdi. 

photo_2023-11-08_06-06-41

"G" guruhi

Bu guruhda hammasi hal bo‘ldi, ya’ni "Leyptsig" ham, "Manchester Siti" ham pley-offga yo‘l oldi. Faqatgina Evropa ligasiga kim chiqishini "Tsrvena Zvezda" va "Yang Boyz" o‘zaro hal qilib olishi kerak bo‘ladi. "Shaharliklar" ushbu turda "Yang Boyz"ni yirik 3:0 hisobida taslim qildi. Xoland dubl, Foden esa bitta gol bilan cheklandi. "Leyptsig" "Tsrvena Zvezda"ni irodali tarzda engdi. Yozda tarkibga kelib qo‘shilgan Simons va Opendaning gollari jamoaga muhim 3 ochkoni olib berdi. 

photo_2023-11-08_06-06-39_1

"H" guruhi

"Barselona" yana o‘zini-o‘zi qiynamoqda. So‘nggi ikki mavsumdan beri klub nimchorak finalga chiqa olmay, Evropa ligasiga tushib ketyapti. Jamoaning bu safar imkoniyati yuqori, lekin "Shaxtyor"dan uchralgan mag‘lubiyatdan so‘ng ko‘p narsa o‘zgarib ketishi mumkin. "Portu" "Antverpen"ni ishonchli tarzda mag‘lub qilib, ochkolari sonini 9 taga etkazib oldi. Shu bilan, guruhda qo‘shhokimlik yuz bermoqda. Bu ikkala klub 5-turda to‘qnash keladi. Agarda o‘sha matchda portugaliyaliklar g‘alaba qozonadigan bo‘lsa va narigi tarafda "Shaxtyor" ham zafar quchsa, unda Xavi shogirdlari uchun guruhdan chiqish imkoniyati keskin kamayib ketadi.

photo_2023-11-08_06-06-44

Ma’lumot uchun, bugun Chempionlar ligasining qolgan uchrashuvlari bo‘lib o‘tadi. "Bavariya", "Arsenal" "Real", "Napoli", "Real Sosedad" va "Inter" klublari pley-offga muddatidan oldin chiqishi mumkin. 

Fikrlar

Fikr qoldirish uchun avtorizatsiyadan o'ting!