Fayzullaev yana gol urganida bormi...

Rossiya Premer-ligasining 16-turida TsSKA o‘z maydonida Moskvaning “Dinamo” kulbiga 2:3 hisobida yutqazib qo‘ydi.

Bu o‘yinning birinchi yarmida Abbosbek Fayzullaev uzoq masofadan chiroyli gol urish barobarida jamoadoshi Anton Zabolotniyga golli pas uzatdi. Har ikki golda ishtirok etgan hujumkor futbolchimiz yana bir necha marta xavfli vaziyat yaratdi. Ulardan birida to‘pni raqib darvozaboni ustidan oshirib tashlagan Abbosga ozgina aniqlik etishmadi.

Legionerimizda ikkinchi bo‘limda ham hisobdagi farqni oshirish imkoni bo‘lgandi.

Ilgari TsSKA va “Dinamo”ni boshqargan taniqli murabbiy Valeriy Gazzaev “Sport ekspress” nashri jurnalistlari bilan suhbatda bu vaziyatga alohida e’tibor qaratdi va Abbosbek Fayzullaev haqidagi fikrlarini ham aytib o‘tdi.

— Agar Fayzullaev hisob 2:1 bo‘lib turganida ikkinchi bo‘lim boshida gol ura olganida natija qanday bo‘lardi?

— Ha, bu bellashuvning eng muhim nuqtasi bo‘ldi. Agar “armiyachilar” hisobni 3:1 qilganida “dinamochilar” o‘yinga qaytishiga u qadar ishona olmasdim...

— TsSKAning o‘zbek legioneriga qanday baho berdingiz?

— Birinchi bo‘limda juda kuchli o‘yin namoyish qildi. Bu yigit ko‘z o‘ngimizda o‘syapti. Hozirning o‘zida jamoani o‘z ortidan ergashtiryapti, golli paslar uzatyapti, o‘zi ham to‘p kirityapti.

TsSKAning qolgan o‘yinchilari fonida yaqqol ajralib, ko‘zga tashlanib turibdi. Juda o‘rqin yarim himoyachi ekan, maydonda o‘yindan o‘yinga porlayapti.

— Uning goli darvozabon Leshukning xatosi natijasimi?

— Ha, “Dinamo” darvozaboni xato qildi. TsSKA o‘yinchisi bunaqa pozitsiyadan zarba berishini kutmagan ko‘rinadi. Lekin bu golda Fayzullaevning mahoratini ham alohida e’tirof etish kerak.

Abbos murakkab zarba yo‘llashga jazm qildi va darvozabonni g‘aflatda qoldirdi. Ofarin!

Eslatib o‘tamiz, Abbosbek Fayzullaev shu yilning avgust oyida “Paxtakor”dan TsSKAga ko‘chib o‘tgan edi. 20 yoshli futbolchimiz qisqa fursatda jamoaning asosiy o‘yinchisiga aylandi.

Fayzullaev sentyabr va oktyabr oylarida TsSKAning eng yaxshi futbolchisi, deb e’tirof etildi. Noyabr oyida ham bu nomga asosiy da’vogarlardan hisoblanadi.

Abbosbek TsSKAga o‘tganidan beri Rossiya Premer-ligasi va mamlakat kubogida jami 15 ta uchrashuvda maydonga tushib, ikkita gol va ettita assist muallifi bo‘ldi.

TsSKA Rossiya Premer-ligasidagi navbatdagi uchrashuvini 3 dekabr kuni o‘z maydonida “Rostov” futbolchilariga qarshi o‘tkazadi.

Zo‘r o‘ynayotgan Husanovga “Lans” asosiy tarkibida joy yo‘qmi?

Murabbiy Abbosbek Fayzullaevga shart qo‘ydi

TsSKA murabbiy gol urib, assist qilgan Fayzullaev o‘yinini qanday baholadi?

Men Messi emas, Abbosman!

Premer-liga klubi: Fayzullaevni kuzatganmiz, u yaxshi futbolchi!

Fayzullaevning ustozi Rossiya klublariga yana ikki futbolchini tavsiya qildi

Buni Fayzullaevdan hech kim kutmagandi

Legionerimiz: Asosiy tarkibda o‘ynashga tayyorligimni isbotlayman