Here we go! Grinvud - "Marsel" futbolchisi

Mavsumni "Xetafe"dan ijarada o‘tkazgan Meyson Grinvud faoliyatini Frantsiyada davom ettirishga qaror qildi. Uni "Marsel" klubi o‘z tarkibiga qo‘shib olishga yaqin turibdi, deya xabar bermoqda insayder Fabritsio Romano. 

Jurnalistning so‘zlariga ko‘ra, 22 yoshli vinger uchun frantsuz jamoasi 30 million evro sarflaydi. Shu bilan birga, futbolchining keyingi transferidan "qizil iblislar" 50 foiz ulush olib qoladi. 

Meyson bilan "Marsel" 2029 yilgacha amal qiladigan shartnoma borasida kelishib olgan. Tez orada u tibbiy ko‘rikdan o‘tish uchun Frantsiyaga yo‘l oladi va transfer rasman e’lon qilinadi. 

2021 yili Grinvudning transfer narxi 50 million evroni tashkil qilar edi. Ammo undan keyin sodir bo‘lgan voqeadan so‘ng narx keskin tushib ketib, dastlab, tekin, undan keyin esa 5 million evroga ko‘tarildi. Ayni paytda vingerning bahosi 25 million evroga tengdir. 

Grinvud uchun so‘nggi mavsum yomon o‘tgani yo‘q. U "Xetafe" tarkibida 36 ta o‘yinda maydonga tushgan bo‘lsa, 10 ta gol urib, 6 ta assist amalga oshirdi. Shuningdek, muxlislar talqiniga ko‘ra, klubning eng yaxshi o‘yinchisi, deb topildi.