Hindiston bosh murabbiyi: "O‘zbekiston g‘alabaga haqli o‘yin namoyish etdi, terma jamoa va o‘zbek xalqini 3 ochko bilan tabriklayman!"

Osiyo kubogi 2-turidan o‘rin olgan Hindiston - O‘zbekiston bahsi bo‘lib o‘tdi. Unda vakillarimiz yirik 3:0 hisobida raqibdan ustun keldi. 

Mazkur o‘yin yakuniga etgach, matbuot anjumanida Hindiston terma jamoasi bosh murabbiyi Igor Stimak o‘z fikrlari bilan o‘rtoqlashdi.

"Ajoyib uchrashuv! Avvalo, ushbu g‘alaba bilan O‘zbekiston terma jamoasi va xalqini 3 ochko bilan tabriklayman!!! Ular g‘alabaga haqli o‘yin namoyish etdi.

Biz ikkala o‘yinda ham g‘alaba uchun harakat qildik. Gol urish uchun imkoniyatlarimiz bo‘ldi. Biroq ulardan unumli foydalana olmadik va haqqoniy ravishda gol o‘tkazib yuborish bilan jazolandik.

To‘g‘ri, xato va kamchiliklarimiz ko‘p ekani yaqqol ko‘rinib turibdi. Ammo muhimi, biz mana shu zaifliklarimiz o‘rnini qoplashimiz va xatolardan saboq olmog‘imiz darkor.

Yigitlar yaxshi harakat qilishdi. Ular mashg‘ulotlarda ham bor kuchlarini ishga solishdi. Lekin bizda tajriba yo‘qligi va hamon rivojlanish jarayonidagi jamoa ekanimiz sabab o‘ylagan barcha rejalarimiz amalga oshavermayapti.

Agar biz musobaqada ajoyib ishtirok etishni istasak, tarkibimizda yuqori saviyadagi futbolchilar jamlangan bo‘lishi lozim. Hozirgi tarkibda tezlik, aniq pas, kuchli pressing kabi tushunchalar deyarli yo‘q. Har qadamda kamchilik bo‘lishi tabiiy. Biroq bu qadar ko‘p bo‘lishi bizning ham ishimizni qiyinlashtiradi", - dedi hindistonliklar bosh murabbiyi.