Husanov jamoasi Chempionlar ligasida qaysi raqib bilan o‘ynaydi?

2025-2026 yilgi mavsumda Yevropa Chempionlar ligasi pley-off bosqichining saralash o‘yinlari yakunlandi va bosh sovrin uchun kurashni davom ettiradigan barcha jamoalar nomi aniqlandi.

Umumiy bochqich yakunlariga ko‘ra, 1/8 finalga chiqqan “Barselona”, “Chelsi”, “Liverpul”, “Tottenxem”, “Sporting”, “Manchester Siti”,  “Arsenal” va “Bavariya” qatoriga pley-offning ikki o‘yinidan muvaffaqiyatli o‘tgan  “Nyukasl”, “Atletiko Madrid”, “Budyo-Glimt”, “Bayer”, “Pari Sen-Jermen”, “Galatasaroy”, “Real Madrid” va “Atalanta” jamoalari qo‘shildi.

Shu munosabat bilan Yevropa klublari o‘rtasidagi asosiy turnirning 1/8 final juftliklari aniqlandi.

Qur’a oldidan Chempionlar ligasi 1/8 final juftliklari quyidagicha ko‘rinish oldi:

“Pari Sen-Jermen” — “Barselona” / “Chelsi”;
“Galatasaroy” — “Liverpul” / “Tottenxem”;
“Real Madrid” — “Sporting” / “Manchester Siti”;
“Atalanta” — “Arsenal” / “Bavariya”;
“Nyukasl Yunayted” — “Chelsi” / “Barselona”;
“Atletiko Madrid” — “Tottenxem” /  “Liverpul”;
“Budyo-Glimt” — “Manchester Siti” / “Sporting”;
“Bayer” — “Bavariya” / “Arsenal”.

Ta’kidlash joizki, Abduqodir Husanov o‘ynayotgan “Manchester Siti” futbolchilari yo “Real”, yoki “Budyo-Glimt”ga to‘qnash keladi. Qiziqi shundaki, Xosep Gvardiola shogirdlari Yevropa Chempionlar ligasining umumiy bosqichida har ikki raqib bilan to‘qnash kelgan.

Mehmonda o‘tkazilgan bahslarda manchesterliklar “Real”ni 2:1 hisobida mag‘lub etib kelgan bo‘lsa, Norvegiyadagi o‘yinda “Budyo-Glimt” 3:1 hisobida zafar quchgan.

1/8 final qur’a tashlash marosimi 27 fevral kuni bo‘lib o‘tadi.

Eslatib o‘tamiz, joriy mavsumda 1/8 finalning ikkitadan  o‘yinlari 2026 yilning 10–11 mart va 17–18 mart kunlari o‘tkaziladi. Turnir finali Budapeshtdagi “Pushkash Arena” stadionida bo‘lib o‘tadi. Hal qiluvchi uchrashuv 2026 yilning 30 mayiga belgilangan.