Marko Stanoevich: "Yanada kuchli jamoaga aylanyapmiz"

Xabaringiz bor, yaqinda “Nasaf” klubi serbiyalik futbolchisi Marko Stanoevich bilan shartnomani uzaytirdi.

O‘z o‘yinlari bilan muxlislar mehrini qozongan yarim himoyachi ayni damda katta ishtiyoq bilan “Nasaf”ning mashg‘ulotlarida ishtirok etyapti.

Futbolchini yangi shartnoma imzolagani bilan tabrikladik va Marko Sports.uz uchun shunday dedi:

“Tabrik uchun katta rahmat. Avvaliga uyda dam oldim, keyin yangi mavsumga tayyorgarlik ko‘rishni boshladim. Jamoadan chaqiruv bo‘lishini va shartnoma taklif qilishini kutdim. Umid qilamanki, bu yil o‘tgan mavsumdan yanada yaxshi bo‘ladi.

Bu yil oldimizga juda katta maqsad qo‘yilgan. Jamoamiz o‘tgan yili ham yaxshi o‘yin ko‘rsatdi, lekin chempionatni yutish uchun ozgina kuchimiz etmadi. Hozir jamoa pozitsiyalar bo‘yicha yangi o‘yinchilar bilan kuchaytirilyapti va biz yanada kuchli jamoaga aylanyapmiz. Muxlislarimiz bir necha yillardan beri kutayotgan natijaga erishishga harakat qilamiz”, - deydi Stanoevich, Sports.uz saytiga.