Nurmagomedov xotirasiga bag‘ishlangan turnirda o‘zbek jangchisi oktagonga ko‘tariladi

Joriy yilning 9 sentyabr oqshomida Rossiyaning "Badiiy gimnastika markazi"da taniqli murabbiy Abdulmanap Nurmagomedov xotirasiga bag‘ishlangan MMA kechasi tashkil etiladi. Mazkur yakkakurash jangida professional sportchilar g‘oliblik uchun oktagonga tushadi.⠀

Ushbu kechaning markaziy jangida Dauren Ermekov Vladimir Mineev bilan o‘rta vazn toifasida FNG chempionlik kamari uchun jang olib boradi.⠀

Shuningdek, bu jang kechasida hamyurtimiz Mironshoh Jafarov 77 kilogramm vazn toifasida rossiyalik Gela Beridzega qarshi oktagonga chiqadi.

"Amir Temur" klubi a’zosi Mironshoh qo‘l jangi bo‘yicha bir necha bor O‘zbekiston chempioni va xalqaro turnirlar g‘olibi bo‘lgan. R-1 professional yo‘nalishi bo‘yicha ko‘p karra g‘olib, MMA bo‘yicha 3:0 hisobida etakchilik qilayotgan jangchilarimizdan biri hisoblanadi.