Og‘ir atletika bo‘yicha Jahon kubogida murabbiylarimizdan kutilmagan qaror

Bugun Xitoyning Tyantszin shahrida og‘ir atletika bo‘yicha Jahon kubogi start oldi. Yilning so‘nggi nufuzli musobaqalaridan birida sayyoramizning eng kuchli polvonlari g‘oliblik uchun bahs olib boradi. Shubhasiz, unda O‘zbekiston terma jamoasi ham g‘oliblik uchun kurashadi. Sizlarni Tokio Olimpiadasiga qimmatli reyting ochkolarini taqdim qiladigan mazkur musobaqa atrofidagi qiziqarli ma’lumot va faktlar bilan tanishtirib o‘tamiz:

Terma jamoamiz ishtirokchilar soni bo‘yicha kuchli uchlikda.

Shubhasiz, O‘zbekiston terma jamoasi vakillari har bir musobaqada etakchilar qatorida tilga olinadi. Bu musobaqada ham vakillarimiz asosiy tarkib bilan ishtirok etmoqda va g‘oliblik uchun bahs olib boradigan vakillarimiz soni 11 nafarni tashkil qiladi. Bu Xitoy (20) va Janubiy Koreya (16) terma jamoalaridan so‘ng uchinchi ko‘rsatkich demakdir.

Adhamjon Ergashev o‘z vaznini o‘zgartiradi

Musobaqaning kutilmagan jihatlaridan biri mahoratli sportchimiz Adhamjon Ergashev ushbu musobaqada -73 kilogramm vazn toifasida ishtirok etishi bo‘ldi. Ma’lumki, vakilimiz -67 kg. toifada ishtirok etib kelardi va ushbu vaznda Tokio Olimpiadasi yo‘llanmasini deyarli naqd qilib qo‘ygan. Murabbiylar shtabining mazkur qarori esa ko‘pchilikni taajjublantirdi. Negaki, bu vaznda Olimpiada reytingida ettinchi pog‘onani egallab turgan Doston Yoqubov ishtirok etib kelar edi. Demak, Jahon kubogida Ergashev va Yoqubov elkma-elka yurtimiz sharafini himoya qilishadi. Ularning asosiy raqibi esa, shubhasiz, musobaqa mezbonlari bo‘ladi.

Jahon kubogida vakillarimiz ishtirok etadigan taqvim:

10 dekabr:
-73 kg: Adhamjon Ergashev va Doston Yoqubov
-81 kg: Muhammadqodir Toshtemirov

11 dekabr:
-55 kg: Muattar Nabieva va Nigora Abdullaeva
-89 kg: Sarvarbek Zafarjonov
-64 kg: Kumushxon Fayzullaeva
-71 kg: Nigora Suvonova

12 dekabr:
-81 kg: Tursunoy Jabborova
-109 kg: Akbar Jo‘raev
+87 kg: Dolera Davronova

Manba: olympic.uz