OKMKni tark etgan murabbiy: "Lokomotiv" bilan ham muzokara olib bordim. Meni faqat bosh murabbiy rolidagi ish qiziqtiradi"

Serbiyalik mutaxassis Aleksandr Stoymirovich OKMK klubidagi faoliyatini yakunladi. Jismoniy tayyorgarlik bo‘yicha murabbiy vazifasida ishlab kelayotgan Stoymirovich bungacha “Neftchi” va “Navbahor”da ham mehnat qilganini bilsangiz kerak.

Uning keyingi manzili ko‘p ehtimol bilan Toshkentning “Lokomotiv” klubi bo‘lishi aytilmoqda. Aniqrog‘i, serbiyalik mutaxassisga bosh murabbiy lavozimi taklif qilinmoqda. Aynan shunday xabarlar juda ko‘p eshitilmoqda. Shu bois Sports.uz jurnalisti Aleksandr Stoymirovichdan intervyu oldi.

- OKMK klubi bilan xayrlashdingiz. Bunga “Lokomotiv”dan tushgan taklif sabab bo‘ldimi?

- Ha, men OKMK bilan tuzgan shartnomamni bekor qildim. Bu qarorga avvalo oilaviy sharoitim tufayli kelganimni alohida ta’kidlagan bo‘lardim.

- “Neftchi”, “Navbahor” va OKMKda jismoniy tayyorgarlik bo‘yicha murabbiy sifatida ishladingiz. “Lokomotiv”ga esa sizni bosh murabbiy roliga taklif qilishmoqda. Bunga tayyormisiz?

- Muzokaralar etarlidan ham ortiq bo‘lgan! Aytishim mumkinki, “Lokomotiv” bilan ham muzokara olib bordim. Meni faqat bosh murabbiy rolidagi ish qiziqtiradi.

- Rostini ayting-chi, bosh murabbiy vazifasida ishlash rejangizda bormidi? Bunday taklifni kutayotganmidingiz?

- Men O‘zbekistonga uch yil oldin yordamchi sifatida kelgandim. Bungacha esa Serbiyada bosh murabbiy bo‘lib ishlaganmvn, UEFA litsenziyasini olganman. Albatta, meni ko‘proq bosh murabbiy rolidagi ish qiziqtirib kelganini ta’kidlagan bo‘lardim va men bunday imkonni juda uzoq kutdim.

- Keyingi rejangiz qanday? Balki “Lokomotiv”ning rejasi bilan bir xildir...

- “Lokomotiv”ning mo‘ljali haqida hozir bir narsa deyolmayman. Agar shu klubda ish boshlasam, u holda siz bilan bu haqda bemalol gaplashamiz.

- 2021 yildan beri O‘zbekistonda ishlayapsiz. Bu erda sizga ko‘proq nima yoqdi?

- Palov!!! Toshkent shahrida do‘stlar orttirdim va bu erda o‘zimni xuddi uydagidek his qilaman.

- OKMK jamoasidagi faoliyatingizni qanday baholaysiz? Nega klub Superliga va OChLda ko‘ngildagidek qatnasha olmadi?

- OKMKga kelsak, bu klubda ko‘p narsani o‘rgandim va ish men uchun juda ham yaxshi maktab vazifasini o‘tab berdi, faqat foydamga ishladi.

- Darvoqe, sizni yangi murabbiylar shtabingizdan Akmal Shorahmedov va Shavkat Mullajonov joy olishi rostmi?

- Shtabimga keladigan bo‘lsak, biror jamoada ish boshlab olay, o‘shanda shtabimda kimlar ishlashini sizga batafsil aytib beraman.

- Shuningdek, “Lokomotiv” Jasur Yaxshiboev, Sanjar Tursunov va Anzur Ismoilov bilan og‘zaki kelishgani haqida eshitdik...

- O‘yinchilar masalasida ham shtabim xususidagi gaplarni takrorlashimga to‘g‘ri keladi! Mayli, o‘sha kun tezroq kelsin, o‘shanda hammasidan albatta boxabar bo‘lasiz.

Shuhratbek Jo‘raev.