Shomurodov keyingi mavsumni qaerda boshlaydi?
“Roma”ga tegishli bo‘lgan Eldor Shomurodovning “Spetsiya” bilan ijara shartnomasi yakunlanishiga bir necha kun qoldi.
Rim klubi qishki transferlar davrida o‘zbek hujumchisi o‘yin amaliyotiga ega bo‘lishi uchun yarim mavsumga "Spetsiya“ga qo‘yib yuborgan edi. A Seriya yakunlandi. Biroq, mavsum oxirida bir xil ochko to‘plagan “Spetsiya” va “Verona” qo‘shimcha uchrashuvda yuqori divizionda qaysi jamoa qolishini o‘zaro hal qilib olishi kerak bo‘ladi.
Bu bahs 11 iyun kuni Udine shahrida, aniqrog‘i "Udineze"ning uy stadioni hisoblangan "Dachiya" arenasida o‘tkaziladi.
Hal qiluvchi o‘yin Toshkent vaqti bilan 23:45 da boshlanadi va unda g‘olib chiqqan jamoa kelasi mavsumni A Seriyada o‘tkazadi, mag‘lub tomon esa, quyi ligaga tushib ketadi.
Eldor Shomurodovning kelasi mavsumdagi faoliyati ko‘p jihatdan ana shu o‘yinga bog‘liq. Nufuzli manba calciomercato.com saytining yozishicha, “Roma” rahbariyatida o‘zbek hujumchisi uchun alohida reja bor.
Gap shundaki, “Roma” angliyalik hujumchi Temmi Abraxamni sotib yuborishga tayyorligini bildirgan. “Chelsi” tarbiyalanuvchisi kelasi mavsumni o‘z yurtida o‘tkazmoqchi. Unga og‘iz solayotgan jamoalar bor.
Abraxamning ketish istagini bildirayotgani poytaxtliklarni transfer bozoriga etaklayapti. Nishondagi hujumchilardan biri “Spetsiya” to‘purari Mbala Nzola. Angolalik futbolchi joriy mavsum A Seriyada 13 ta gol urib, faoliyatidagi eng yuqori ko‘rsatkichni qayd etdi.
26 yoshli forvard yaqinda “Spetsiya” bilan shartnomasini 2026 yilning yarmigacha uzaytirdi. Biroq, yaxshi taklif bo‘lsa, ketishga tayyor. Manbalar Nzola “Roma”ga o‘tishga rozi ekanini yozmoqda.
Xususan, calciomercato.com saytining ma’lum qilishicha, “Roma” rahbariyati Mbala Nzola uchun 8,5 million evro va qo‘shimcha bonuslar bermoqchi. Bundan tashqari, transferga yosh iqtidor egasi Benjamin Taxirovichni qo‘shib berish rejasi. Eng asosiysi esa, rimliklar liguriyaliklarni Nzolani qo‘yib yuborishga ko‘ndirish uchun Eldor Shomurodovning bu jamoadagi ijara muddatini yana bir mavsumga uzaytairib berishga tayyor.
“Roma”ning bu rejasi amalga oshishi uchun “Spetsiya” 11 iyun kuni “Verona”ni engib, yuqori diviziondagi joyini saqlab qolishi kerak.
Chunki Nzola transferida muhim rol o‘ynaydigan Eldor Shomurodov “Spetsiya” quyi ligaga tushib ketgan taqdirda bu jamoaga qaytib bormaydi.
Aslida yozgi transferlar davri o‘zbek legioneri uchun ham muhim ahamiyat kasb etadi. Agar “Roma” unga kelasi mavsum ham etarli o‘yin amaliyotini berishni kafolatlamasa, O‘zbekiston milliy terma jamoasi sardori o‘ziga boshqa jamoa tanlashi kerak bo‘ladi.
Eldor Shomurodov keyingi paytda faqat A Seriyada qolishni istamoqda va o‘tgan transfer mavsumlarida Turkiya, Germaniya, Angliya, Ispaniya, Frantsiya, Rossiya va Saudiya Arabistonidan bo‘lgan chorlovlarga e’tibor qaratgani yo‘q.
Fikrlar