Slot: "Saloh Afrika millatlar kubogi haqida o‘ylayapti"

"Liverpul" bosh murabbiyi Arne Slot Muhammad Saloh haqida fikr bildirdi. Yaqinda misrlik futbolchi tarkibga kiritilmagani yuzasidan bildirilgan tanqidlar ortidan jamoaning Chempionlar ligasidagi o‘yinini o‘tkazib yuborgan edi.

— O‘tgan hafta ham aytganman: amal so‘zlardan balandroq turadi. Biz bu masalani ortimizda qoldirdik. Saloh o‘tgan o‘yin uchun ro‘yxatda bor edi va men amalga oshirgan birinchi almashtirish aynan u bo‘ldi. Oldinda uni Afrika millatlar kubogi va katta o‘yinlar kutyapti. Hozir u shu haqda o‘ylayapti, — dedi Slot matbuot anjumanida.

Shanba kuni mersisaydliklar Angliya chempionati doirasida "Tottenxem"ga qarshi safar o‘yinini o‘tkazadi. Uchrashuv Toshkent vaqti bilan soat 22:30'da boshlanadi.