Xalk Xogan vafoti bo‘yicha tergov davom etmoqda!

"Daily Mail" nashri xabar berishicha, amerikalik afsonaviy restler Xalk Xoganning o‘limi yuzasidan politsiya tergovni davom ettirmoqda.

Avvalroq, sportchining vafotiga yurak mushagiga qon oqimining to‘satdan buzilishi sabab bo‘lgani ma’lum qilingan edi. Shu bilan birga, o‘limga shifokor xatosi sabab bo‘lishi mumkinligi ham taxmin qilinmoqda. Xoganning xotini bu borada da’vo arizasi bergan. Mazkur ishni ko‘rib chiqish va rasmiy tekshiruvlar ikki yilgacha cho‘zilishi mumkin.

"Birinchidan, tibbiy ma’lumotlar olinishi kerak. Ekspert tibbiy yordam ko‘rsatish standartlariga rioya qilmaslik bo‘lgan yoki yo‘qligini ham aniqlashi kerak. Shuningdek, ushbu ekspertning qasamyod guvohnomasi taqdim etilishi, keyin esa sudga murojaat qilish niyati haqida xabar berilishi kerak. Ayblanuvchi ham xuddi shunday qilishi lozim: qonunda belgilanganidek, 90 kun ichida o‘z ekspertlarini yollashi, hujjatlarni ko‘rib chiqishi va o‘z tekshiruvini o‘tkazishi shart. Shundan so‘ng ular nizoni hal qilishlari mumkin. Aytmoqchimanki, da’volarning 95-99 foizi sudgacha bo‘lgan bosqichda rad etiladi", - deya ta’kidladi tibbiy huquqbuzarliklar bo‘yicha advokat Jo Osborn.

Eslatib o‘tamiz, Xalk Xogan 24 iyul kuni 71 yoshida vafot etdi. U 1980–1990 yillarda professional restlingning eng mashhur yulduzlaridan biri bo‘lgan, WWF (hozirgi WWE) arenasida yirik muvaffaqiyatlarga erishgan va kino olamida ham faoliyat yuritgan.