“Арсенал” чемпион бўлолмайди

Англия футболи ва “Манчестер Юнайтед” афсонаси Гари Невилл жорий мавсумда илк бор “Арсенал”нинг чемпион бўлишига бўлган ишончини йўқотганини маълум қилди.

Мавсум бошидан буён Невилл бир неча маротаба “Арсенал”ни Премьер-лига чемпионлиги учун асосий даъвогар сифатида кўраётганини айтган эди.

Бироқ ўтган ҳафта охирида “Манчестер Сити”га 1:2 ҳисобида мағлуб бўлганидан сўнг, Англиянинг саккиз карра чемпиони Невилл “Арсенал”га ишончини йўқотди ва энди устунликни “Сити”га бермоқда.

Унинг фикрича, ҳар икки жамоа ҳам қолган барча ўйинларда ғалаба қозона олмайди. “Арсенал” чемпион бўлиши учун “Сити” қаердадир очко йўқотиши керак, аммо бу қачон ва қаерда содир бўлиши ноаниқ.

Невиллнинг таъкидлашича, энди “Манчестер Сити” чемпионлик пойгасида катта устунликка эга.

Шунингдек, у “Арсенал” учун навбатдаги ўйин – “Ньюкасл”га қарши баҳс катта хавф туғдиришини айтди. Агар жамоа ўйинни яхши бошламаса, стадионда асабийлик ва босим ортади.

Невилл олдиндаги учрашувларда ҳам босим сақланиб қолишини ва “Арсенал” футболчилари бу оғир вазиятни енгиб ўтиши кераклигини таъкидлади.