“Реал” ичидан емириляпти, етакчилар ўртасида зиддият кучаймоқда

“Реал Мадрид”да жорий мавсумдаги омадсизликлар оқибатида кийиниш хонасида кескин муҳит юзага келган, деб хабар бермоқда Footmercato.

Манба маълумотига кўра, натижалардан ташқари, клубни энг кўп ташвишга солаётган масала — ички муҳит. Еврокубоклардан чиқиб кетилганидан кейин футболчилар тушкун кайфиятда ва вазиятга тан бергандек кўринмоқда.

Мағлубиятлардан кейин кийиниш хонаси “жаноза муҳити”ни эслатмоқда, у ерда жамоани ортидан эргаштира оладиган ҳақиқий етакчилар йўқ. Манбалар таъкидлашича, ҳатто машғулотлар ҳам яширин таранглик, кўз қарашлардан қочиш ва айтилмаган зиддиятлар жойига айланган. Жамоанинг айрим етакчи футболчилари ўртасида аллақачон келишмовчиликлар бошланган.

“Реал Мадрид” Чемпионлар лигаси чорак финалида икки ўйин натижасига кўра Баварияга мағлуб бўлган эди. Испания чемпионатида жамоа иккинчи ўринда бормоқда ва пешқадам Барселонадан 11 очко ортда қолмоқда.