Клублар ўртасидаги жаҳон чемпионатида энг кўп гол урган 6 футболчи

18 декабрь, 2016, 19:56
0
Футбол

Клублар ўртасидаги жаҳон чемпионати мусобақаси ҳам ўз ниҳоясига етди. Биз сизнинг эътиборингизга ушбу турнирдаги энг сермаҳсул олти футболчи ҳақидаги блогпостни хавола қиламиз.

6. Муҳаммад Абутрика. 11 ўйин - 4 гол
Мисрнинг "Ал Ахли" жамоаси ҳужумчиси Абутрика 5 та жаҳон чемпионатида иштирок этган. Муҳаммад 2006 ва 2008 йилги мусобақаларда рақиблар посбонларини 4 бора ранжитишга муваффақ бўлган.

5. Денилсон. 3 ўйин - 4 гол
Денилсон Жанубий Кореянинг "Поханг Стилерс" клуби сафида 2009 йилги мусобақада 3 та ўйинда 4 та гол киритган. Бразилиялик ҳужумчи ўша турнирда Мессини ортда қолдириб, энг яхши тўпурарга аталган совринга эга чиққан.

4. Сезарь Делгадо. 6 ўйин - 5 гол
Мексиканинг "Монтеррей" жамоаси ҳужумчиси 2011-2013 йилларда кетма-кет уч марта турнирда иштирок этган. Аргентиналик футболчи 2012 ва 2013 йилги мусобақаларда 5 марта ўз номини таблога ёздириб қўйган.

3. Криштиану Роналду. 6 ўйин - 5 гол
Криштиану 2008 йилги мусобақада "Манчестер Юнайтед" таркибида битта гол урган бўлса, 2014 йили "Реал" либосида гол ура олмаган эди. Бу йилги мавсумда эса португалиялик тўртта гол билан энг сермаҳсул тўпурар бўлди.

2. Лионел Месси. 5 ўйин - 5 гол
Аргентиналик ҳужумчи 2009, 2011 ва 2015 йилги турнирларда гол урган. Шу тариқа, аргентиналик учта мундиалда гол урган ягона футболчига айланди.

1. Луис Суарес. 2 ўйин - 5 гол
Суарес ўтган йили "Барселона" таркибида 5 та гол урди. Уругвайликка шунча гол уриш учун атиги 2 та ўйин кифоя қилди. Луис турнирда бир мавсумда энг кўп гол урган футболчи сифатида тарихга кирди.

Фурқат Юсупов тайёрлади