Роналдуни Абдуқодир Ҳусанов ўйнаётган мусобақага чақиришди
Европанинг машҳур футболчилари ва мураббийлари учун Осиё қитъасига йўл очиб берган юлдуз сифатида тарихга кирган Криштиану Роналдунинг бир фикри катта эътирозларга сабаб бўлди.
“Ан-Наср” тўпурари ўзи ўйнаётган Саудия Арабистони профессионал лигаси ва Франциянинг Лига 1 мусобақасини таққослаб, айни пайтда осиёликларнинг лигаси кучлироқ эканини таъкидлаган эди.
- Мен Саудия Арабистонида бир йилдан бери ўйнаётганимни инобатга олиб, бу чемпионат Лига 1 мусобақасига қараганда рақобатбардош эканини айта оламан. Бизнинг лига ҳозирнинг ўзи Франция чемпионатидан кучли, - деган эди Криштиану Роналду.
Португалиялик юлдузнинг иддаосига Франция чемпионатига бефарқ бўлмаган мураббийлар, мутахассислар, футболчилар ўз муносабатини билдирмоқда. Бу мавзу ижтимоий тармоқларда жуда кенг муҳокама қилиняпти. Уларнинг аксариятида Роналдунинг фикри танқид остига олинаётган бўлса, Криштианунинг гапини тўғри санаётганлар ҳам йўқ эмас.
Франция чемпионати иштирокчиси “Брест” бош мураббийи Эрик Руа Криштиану Роналдуга таклиф билан чиқди.
- Мен Криштиану Роналдуни бу ерга, майдонга таклиф қиламан. У буни қабул қиладими йўқми, билмайман, лекин бир келсин.
Гап мен унинг фикрига қўшилмаслигим ҳақида эмас. Масала Роналду ҳеч қачон Лига 1 ўйинларида иштирок этмаганида. Шундай экан қандай қилиб ўзи ўйнамаган лигани солиштириш мумкин?
Бунинг учун аввал бу ерга келиб, лигамизда ўйнаб кўриш керак. Мен унинг фикрини ҳурмат қиламан, бироқ бошқа гапим йўқ, - деди Эрик Руа.
Франция чемпионатининг олий дивизиони – Лига 1 мусобақаси Англия Премьер-лигаси, Испания Ла Лигаси, Германия Бундеслигаси ва Италия А Серияси қаторида Европанинг “топ-5” лигаларини ташкил қилади.
Дарҳақиқат, Криштиану Роналду Европадаги фаолияти давомида “топ-5” лигалар орасида Англия, Испания ва Италия чемпионатларида ўйнаган. Португалиялик юлдузга Германия ва Франция юқори дивизионларда ўйнаш насиб қилмаган.
Биз учун аҳамиятли томони, Франция чемпионатида Абдуқодир Ҳусанов тўп тепмоқда. 19 ёшли футболчимиз вице-чемпион “Ланс” футболчиси ҳисобланади.
Ҳусанов Франция чемпионатида ўйнаётган ягона ўзбек футболчиси.
Кучли бешлик чемпионатларидаги яна бир вакилимиз Элдор Шомуродов фаолиятини Италияда давом эттирмоқда. Қизиғи шундаки, Шомуродов А Серия ўйинларида “Ювентус” шарафини ҳимоя қилган Криштиану Роналду билан майдонда рақобатлашган футболчимиз ҳисобланади.
Сўнгги йилларда Франция футболида Килиан Мбаппе, Неймар, Лионель Месси каби жаҳон футболи юлдузлари ҳам фаолият олиб борган.
Фикрлар