Rasman! "JCh-2026" ochilish o‘yini qaerda bo‘lib o‘tishi ma’lum

2026 yilda bo‘lib o‘tadigan Jahon chempionatiga Meksika, AQSh va Kanada davlatlari mezbonlik qiladi. FIFA rasmiy sahifasi orqali mana shu mundialning ochilish o‘yini qaysi stadionda bo‘lib o‘tishini ma’lum qildi. 

"2026-JCh"ning birinchi uchrashuvi Meksika poytaxti Mexiko shahrida joylashgan "Estadio Asteca" stadionida o‘tkaziladi. 

Ushbu stadion juda ham mashhur bo‘lib, shu paytgacha ikki marta mundial finaliga mezbonlik qilgan (1970 va 1986). Pele boshchiligidagi Braziliya terma jamoasi 1970 yilda "Estadio Asteca"da bo‘lib o‘tgan bahsda Italiyani 4:1 hisobida mag‘lub qilib, 3-bor jahon chempioniga aylangan.

"1986-JCh" chorak final doirasida bo‘lib o‘tgan Argentina - Angliya uchrashuvida inglizlar 2:1 hisobida mag‘lub bo‘ldi. O‘yinda Diego Maradona dubl qilgan va gollaridan birini siz aniq bilasiz. Argentina afsonasi qo‘li bilan darvozani ishg‘ol qilgan bahs aynan "Estadio Asteca"da o‘tkazilgan. O‘sha yili argentinaliklar turnir g‘olibiga ham aylandi.

Lotin Amerikasida kattaligi bo‘yicha birinchi o‘rinda turadigan "Estadio Asteca"da Meksika terma jamoasi o‘z o‘yinlarini o‘tkazadi. Mazkur stadion o‘z bag‘riga 87523ta odamni sig‘dira oladi.