Файзуллаев нега Европада ўйнамаяпти? “Барса” собиқ юлдузи вазиятни тушунтириб берди
Ёзги трансферлар даври яқинлашгани сари Аббосбек Файзуллаевнинг Европага кетиши яна энг кўп муҳокамага қилинаётган долзарб масалалар қаторига қўшилди.
Яқинда нуфузли манбалардан бири – euro-football.ru сайти 21 ёшли ўзбек футболчисини Испания ва Франция клублари кузатиб бораётгани ва ёзда Файзуллаев ЦСКАдан кетиши мумкилиги ҳақида маълумот чиқарди.
Бундан аввал, нуфузли промоутерлик компанияси Pro Sports Management раҳбари Герман Ткаченко Аббосбек Файзуллаевнинг Европага кетадиган вақт келганини ва ўзбек легионерининг мақсади топ-лигаларда ўйнаш эканини таъкидлаган эди.
Ткаченко Россия футболига қўлланилган санкциялар туфайли Аббос Европага йўл олишдан аввал орада қисқа муддат бошқа лигалардан бирида ўйнаши ҳам мумкинлигини таъкидлаган эди.
Айни пайтда ЦСКАда тўп тепаётган Миралем Пьянич “армиячилар”нинг энг кучли футболчиларидан ҳисобланган Аббосбек Файзуллаев ва Игорь Дивеевнинг ҳали ҳам Европа чемпионатларида ўйнамаётганига изоҳ берди.
Маълумки, босниялик футболчи Европа футболини яхши билади. У аввал Франция, Италия, Испания, Туркиянинг қудратли клублари шарафини ҳимоя қилган. “Ювентус” таркибида тўрт бор Италия чемпиони, икки бор мамлакат кубоги ва бир марта Суперкубок соҳиби бўлган.
“Барселона” сафида Испания кубоги мусобақасида бош совринни қўлга киритган. Шунингдек, “Бешиктош” фуболчиси сифатида Туркия Суперкубогида ғолиб чиққан.
- Игорь Дивеев ва Аббосбек Файзуллаев мавсумни жуда яхши ўтказяпти ва ҳар иккиси ҳам жамоамиз учун энг муҳим ўйинчилардан ҳисобланади. Бундан ташқари, бошқа жамоадошларимиз ҳам бу мавсумда ўзини кўрсата оляпти.
Нега Игорь ва Аббос ҳали ҳам Европада ўйнамаяпти? Балки улар тез орада кучли лигаларга йўл олар. Мен уларнинг аввалги фаолиятларидан бехабарман. Ҳозир эса, биз ЦСКА деган катта клуб ҳақида гаплашяпмиз. Биз бу клубни ҳурмат қиламиз.
Бу йигитлар ҳам жамоада ўзини бахтиёр ҳис қиляпти. Улар учун ҳар дам олиш кунлари ЦСКА футболкасида майдонга тушиб, ўзларини кўрсатиш жуда катта имконият ҳисобланади.
Энг аввало, Дивеев ҳам, Файзуллаев ҳам фаолиятларидан нимани кутаётганларини, ўзлари нимани исташаётганини аниқлаб олишлари керак. Улар Европада ўйнаб кета оладиган чарм тўп усталаридир.
Ким билсин, балки улар шу ерда бахтиёрдир? Балки уларга ЦСКАнинг энг муҳим ўйинчиларидан бўлиб қолиш ёқар? Эҳтимол, улар бутун фаолиятини ЦСКАда ўтказмоқчидир?, - деди Миралем Пьянич.
Эслатиб ўтамиз, Аббосбек Файзуллаев 2023 йилнинг августида “Пахтакор”дан Москванинг ЦСКА клубига кўчиб ўтди. Ҳужумкор футболчимиз хориж чемпионатидаги дебют мавсумида Россия Премьер-лигасининг энг ёрқин кашфиёти сифатида эътироф этилди.
21 ёшли чарм тўп устаси ҳозирга қадар “армиячилар” сафида барча турнирларда 63 та учрашувда иштирок этиб, рақиблар дарвозасини саккиз маротаба ишғол қилди ва жамоадошларига 21 та голли пас узатди.
Шунингдек, Файзуллаев қисқа фурсатда Ўзбекистон миллий терма жамоасининг ҳам етакчи ўйинчиларидан бирига айланди. Аббос бир ярим йилдан сал кўпроқ вақт мобайнида халқаро майдонда 25 та учрашувда иштирок этиб, ўз ҳисобига саккизта гол ёздириб қўйди.
Transfermarkt портали томонидан саккиз миллион еврога баҳоланаётган ўзбек легионерининг ЦСКА билан амалдаги шартномаси 2026 йилнинг ёзигача тузилган. Томонлар ўзаро келишган ҳолда ҳамкорликни яна бир йилга узайтириши мумкин.
Фикрлар