Грандлар талашаётган Вирц ўзига жамоа танлади

Германиянинг амалдаги чемпиони – “Байер” клуби юлдузи Флориан Вирц  ёзги трансфер ойнаси олдидан Европанинг энг кучли клублари эътиборида бўлиб турибди.

21 ёшли футболчига “Бавария”, “Манчестер Сити” ва “Реал Мадрид” каби гранд клублар қизиқиш билдирмоқда. 

Бироқ Германиянинг нуфузли BILD нашрининг хабарига кўра,  Вирц ўз келажаги борасида қарор қабул қилган — у айнан “Реал Мадрид”да ўйнаш орзусини амалга оширмоқчи. 

Манбага кўра, футболчининг яқинлари ҳам шу фикрда қатъий турибди. У бошқа вариантларни қабул қилишга шошилмайди ва сабр билан Мадрид клуби таклифини кутишга тайёр. 

Вирцнинг леверкузенликлар билан амалдаги шартномаси 2027 йилнинг ярмигача мўлжалланган. Жамоа футболчига 125 миллион евролик товон пули белгилаган.

Бу ёзги трансфер бозори қизғин кечиши ва Вирцнинг "Реал"га эҳтимолий кўчиши энг катта воқеликлардан бири бўлиши кутилмоқда.