Кунья 10-рақамни нега танлагани ҳақида батафсил гапирди

Хабарингиз бор, бразилиялик ҳужумчи Матеус Кунья янги мавсумда "Манчестер Юнайтед" сафида 10-рақам остида тўп суради. Аввалроқ ушбу рақам остида Маркус Рэшфорд ҳаракат қиларди, аммо у Рубен Аморимнинг режаларида йўқ ва катта эҳтимол билан ёзда жамоани тарк этади.

Кунья ўзининг "Олд Траффорд"да 10-рақамни қабул қилиши ҳақида клуб матбуот хизматига шундай деди:

"Вау! Бу мен ҳар доим орзу қилган нарса. Бу рақамда ўйнаган кўплаб буюк футболчиларни санашим мумкин. Уни кўрганимдаёқ Уэйн Руни ёдимга тушади – мен унинг ўйинларини кўриб катта бўлганман.

Бир куни Рэшфорд билан футболка алмашгандим, ўша либоси ҳали ҳам уйимда сақланяпти. Бу рақамда шунингдек ван Нистелрой, Ибрагимович ҳам ўйнаган.

10-рақамда тўп суриш — бу шунчаки орзу эмас. Бу рақамнинг тарихи катта ва мен учун бу улкан шараф" - дея таъриф бериб ўтди "қизил иблислар"нинг янги футболчиси.