Родриго "Реал"даги келажагига ойдинлик киритди

Клублар ўртасидаги Жаҳон чемпионатида "Реал Мадрид" футболчиси Родриго 6 та ўйиндан 3 тасида жами 100 дақиқа атрофида майдонда бўлди. Плей-офф босқичида эса бразилиялик ҳужумчи фақат чорак финалнинг сўнгги дақиқаларида иштирок этди.

Бу ҳолат Родригонинг жамоадаги келажагига оид миш-мишларни янада кучайтирмоқда. Бироқ, "Globo Esporte" нашрининг хабарига кўра, футболчининг ўзи ҳозирча "Реал"да қолиш ва асосий таркиб учун курашишни афзал кўрмоқда. У фақатгина клубнинг ташаббуси билан трансферга рози бўлиши мумкин.

Эслатиб ўтамиз, Родригонинг шартномаси 2028 йилнинг ёзигача амал қилади. Transfermarkt портали футболчини 90 миллион еврога баҳолаган.

Бир неча машҳур нашрларнинг хабарига кўра, "қироллик клуби"нинг футболчисига асосий даъвогарлар - "Арсенал", "Манчестер Сити", ПСЖ ва "Ан-Наср" бўлиб турибди.