"Реал" Родригони сотишга тайёр. Клуб футболчига нарх белгилади

Мадриднинг "Реал" клуби бразилиялик ҳужумчи Родригони сотишга қарши эмас. Журналист Николо Скиранинг хабар беришича, агар яхши таклиф бўлса, "қироллик клуби" 24 ёшли футболчи билан хайрлашиши мумкин.

Айни пайтда Родриго Англия Премьер-лигасининг қатор етакчи клублари эътиборида. Хусусан, аввалроқ "Арсенал" ва "Ливерпуль" томонидан қизиқиш билдирилгани ҳақида хабарлар тарқалган эди.

"Реал" футболчи учун 120–130 миллион евро атрофида компенсация талаб қилмоқда. Таъкидлаш жоиз, Родриго "қаймоқранглилар" сафида 2019 йилдан бери тўп сурмоқда. Унинг амалдаги шартномаси 2028 йилнинг ёзигача мўлжалланган. Transfermarkt портали ҳужумчини 90 миллион еврога баҳолаган.