Тер Штеген "Барселона"ни тарк этмоқчи эмас, аммо вазият ноаниқ

Марк-Андре тер Штеген келаси мавсумда асосий дарвозабон бўлмаслигидан ғазабда, аммо клубни тарк этиш нияти йўқ. Бу ҳақда "Cadena SER" нашри хабар бермоқда.

Ўтган ҳафта "Барселона" бош мураббийи Ханс-Дитер Флик немис посбонига унинг янги мавсумда захирада бўлишини маълум қилган эди. Шу билан бирга, футболчининг агенти эҳтимолий трансфер учун янги жамоа излашга киришган.

Клубнинг ички муҳитида эса дарвозабоннинг келаётган Жаҳон чемпионатида қатнашишни хоҳлаши сабабли кетиши мумкинлиги таъкидланмоқда. Агар у кетадиган бўлса, "Барса" футболчига юқори маошдан воз кечиши учун маълум миқдорда компенсация тўлаши мумкин.

Шунингдек, тер Штегеннинг трансфери орқали маош харажатларини қисқартириш "кўк-анорранглилар" раҳбариятининг асосий мақсадларидан бири сифатида кўрилмоқда.