"Барселона" янги футболчиларни рўйхатдан ўтказиш учун ечим топди

"Барселона" Марк-Андре тер Штеген ўрнига янги футболчиларни рўйхатдан ўтказишга умид қилмоқда.

Кеча германиялик дарвозабон Бордо шаҳрида орқа қисмида жарроҳлик амалиётини ўтказди. AS нашрининг хабар беришича, жарроҳ Амели Леглиз операциядан сўнг дарҳол тайёрланган дастлабки ҳисоботида футболчи тахминан тўрт ой давомида ўйинлардан четда қолишини тасдиқлаган.

"Барселона" Ла Лига тиббий қўмитасига тақдим этадиган ҳужжатда ҳам худди шундай муддат кўрсатилади. Агар у маъқулланса, каталонияликлар тер Штегеннинг маошидан 80 фоизини тўлаш имконияти билан янги футболчини рўйхатдан ўтказиш ҳуқуқига эга бўлади.

Бироқ, операция тўғрисидаги ҳисоботнинг ўзи етарли бўлмайди - клуб қўшимча далилларни, жумладан МРТ натижаларини ёки ҳатто операциянинг видеоёзувларини ҳам тақдим этиши керак. Шунингдек, ўйинчининг жароҳат билан боғлиқ касаллик тарихи ва уни операция қилган жарроҳнинг хулосаси ҳам тақдим этилиши лозим. Уч ой давомида ўйинлардан четда қолишини айтган футболчининг ўз баёноти экспертлар томонидан эътиборга олинмайди.