Анъана бузилган маросимда Ҳарри Кейн "Олтин тўп" соҳибига айланди

«Бавария» ҳужумчиси Ҳарри Кейн «Олтин тўп» совринига сазовор бўлди. У сўровнома натижасига кўра ғолиб, деб топилди.

Бу йилги маросимнинг яна бир ўзига хос жиҳати шундаки, 2026 йилда «Олтин тўп» анъанавий равишда ўтказиб келинадиган Париж эмас, балки Лондонда топширилди. Бундай қарор танлов тарихидаги муҳим сана – 70-марта ўтказилаётган тақдирлаш маросими шарафига қабул қилинди. 

Мезбон сифатида айнан Англия танланишига эса тарихий омил сабаб бўлди: 1956 йилда илк «Олтин тўп»ни айнан инглиз футболчиси Стэнли Мэттьюз қўлга киритган. «Дриблинг сеҳргари» номи билан танилган афсона 2000 йилда вафот этган.

Натижада вазият рамзий тус олди: Англияда ўтган маросимда «Олтин тўп» яна бир бор инглиз футболчисига насиб этди. Қолаверса, Ҳарри Кейн Лондон атрофида туғилган ва узоқ йиллар давомида Премьер-лигада «Тоттенхэм» шарафини ҳимоя қилган.

Эркаклар ўртасидаги овоз беришда Кейн асосий даъвогарлардан бўлган «Барселона»  юлдузи Ламин Ямал ва «Реал» етакчиси Килиан Мбаппени ортда қолдирди. Бу натижа, табиийки, Каталония ва Мадрид клублари раҳбарияти, шунингдек, мазкур юлдузлар атрофидаги улкан интернет мухлислар армияси орасида баҳс ва норозиликларга сабаб бўлиши мумкин.

Шунга қарамасдан, Kane натижалари ва ўйини билан бу нуфузли совринга тўлиқ муносиб экани таъкидланмоқда. L’Équipe нашри ташаббуси билан бериладиган бу мукофот бутун дунёдаги спорт журналистлари ва футбол расмийлари овозига асосланади. Кейн учун бу йил Европанинг энг яхши тўпурари сифатида “Олтин бутса”ни қўлга киритган, «Бавария» билан Бундеслига чемпиони бўлган, Англия терма жамоасини жаҳон чемпионати ярим финалига етаклаган ва энг муҳими, катта юлдуз бўлса-да, камтарона хулқи билан эътироф қозонган мавсумнинг мантиқий давомидир.

“Бу йил жуда оғир бўлди, рақобат қилган футболчилар ҳақиқатан ҳам ажойиб эди”, – деди Ҳарри Кейн совринни қабул қилаётганида. У минбардан туриб деярли барча номзодларни алоҳида табриклади, фаолияти давомида бирга ўйнаган деярли барча жамоадошларига миннатдорлик билдирди.

“Ҳозир деярли сўз тополмаяпман. Бу маросимнинг айнан Лондонда ўтиши мен учун янада ўзига хос аҳамият касб этмоқда”, – дея қўшимча қилди у.

Қуруқ рақамлар ҳам Кейннинг бу мавсумдаги ўйини қай даражада эканини яққол кўрсатади: 2025 йил августидан буён клуб ва терма жамоа сафида жами 89 та гол урган.