«Эль-класико»ларда кетма-кет ўйинларда гол урганлар ТОП-5
Ads

Кеча «Эль-класико»лардаги энг сермаҳсул футболчилар ҳақида маълумот бериб ўтган эдик. Бугун «Реал» ва «Барселона» қарама-қаршилигида кетма-кет ўйинларда гол урган футболчилар бешлигини эътиборингизга ҳавола қиламиз.



 

3-5. Жованни. «Барселона»

Серия: 4 ўйин (4 гол)

«Барса» футболчиси Жованни 1997 йилги Испания суперкубогининг дастлабки учрашувида «Реал» дарвозасини ишғол қилди. Бразилиялик ҳужумчи «бланкос»га қарши кечган кейинги 3 ўйинда ҳам гол уриб, голли сериясини 4 тага етказиб олишга муваффақ бўлган.



 

3-5. Роналдиньо. «Барселона»

Серия: 4 ўйин (5 гол)

«Барселона» ярим ҳимоячиси Роналдиньо «Эль-класико»лардаги голлар сериясини 2004 йили Испания чемпионатининг 12-турида бошлаб берган эди. Ўшандан сўнг бразилиялик футболчи яна 3 та «класико»да зафар қучди. У «Реал»га қарши ана шу 4 ўйинда Касильяс дарвозасини 5 марта аниқ нишонга олишга эришганди.



 

3-5. Симон Леку. «Реал Мадрид»

Серия: 4 ўйин (5 гол)

Леку 1935 йилда мамлакат чемпионатида «Барса» дарвозасини ишғол қилиб, «класико»лардаги голли сериясини бошлаб берган эди. Испаниялик ҳужумчи 1939 йилги чемпионатда ҳам Каталонияликлар дарвозасига гол уриб, ана шу серияни 4 ўйинга етказди.



 

2. Иван Самарано. «Реал Мадрид»

Серия: 5 ўйин (5 гол)

«Реал»нинг Чилик ҳужумчиси Самарано «Барселона»га қарши кечган ўйинларнинг кетма-кет 5 тасида майдонни голсиз тарк этмаган. Энг қизиғи Иван ана шу серияни 1993 йилда амалга оширган эди.



 

1. Криштиану Роналду. «Реал Мадрид»

Серия: 6 ўйин (7 гол)

«Эль-класико»ларда кетма-кет ўйинларда гол уриш борасида рекордчи Роналду ҳисобланади. Португалиялик ҳужумчи «Барса»га қарши ўйинларнинг қаторасига 6 тасида зафар қучган. У бу серияни 2012 йили мамлакат кубогида бошлаган бўлса, ўша йил чемпионат баҳсларида якунлаган эди. Криш 6 та голли сериясида «Барса» дарвозасига жами 7 гол киритган.



 

Фурқат Юсупов тайёрлади