Гвардиола Ҳусанов бўйича қарорини айтди
“Манчестер Сити” Англия Премьер-лигасининг иккинчи турида ўз майдонида “Тоттенхэм”дан 0:2 ҳисобида мағлубиятга учраганидан кейин Хосеп Гвардиола танқидлар остида қолиб кетди.
Гап шундаки, испаниялик мутахассис ҳимоячилар учун танлаган тактика кутилган самарани бермади. Аксинча, рақиб футболчилари иккита голни ҳам орқа чизиқ ўйинчиларининг хатоларидан кейин урди.
Ниҳоят, Хосеп Гвардиола ўзига нисбатан бўлаётган танқидларга муносабат билдирди. 53 ёшли мутахассис ўзи янги мавсум учун танлаган ғоясидан воз кечмаслигини, қарорларида қатъий туришини билдирди.
- Юқори чизиқли ҳимоя усулидан воз кечмайман. Анчадан бери менга мана шу усулни қўллаб, шиддатли ўйин кўрсатиш ёқади. Айрим вазиятларда, хусусан, “Тоттенхэм” билан бўлган ўйиндагидек, омадсизликлар ҳам учраб туради.
Биринчи гол урилган вазиятда ҳаммасини бир неча сантиметр ҳал қилди, холос. Биз шундай ўйнашда давом этамиз.
Табиийки, вазиятдан клиб чиқиб, мослашишга ҳаракат қиламиз. Мен таъсирга тушиб қоладиган одам эмасман. Мақсадимиз ўзгармайди – ҳар доимгидек агрессив ҳимояланамиз, - деди Хосеп Гвардиола ўзига бўлаётган танқидларга жавобан.
Таъкидлаш жоизки, ўйинни таҳлил қилаётган экспертлар “Манчестер Сити” ҳимоячиларига “Тоттенхэм”нинг ўткир ҳужумларини қайтаришда тезлик етишмаганини, бу учрашувда Абдуқодир Ҳусановни ўйнатиш кераклиги ҳақида ўз хулосаларини билдирди.
Жамоа мухлислари ҳам жамоага шиддатли ўйини ва тезкорлиги билан ажралиб турадиган ўзбекистонлик легионери етишмаганини эътироф этмоқда.
Хосеп Гвардиода журналистлар билан учрашувда марказий ҳимоячилар борасидаги вазият ва улар учун жорий мавсумга мўлжалланган асосий талабларни ҳам айтиб ўтди.
- Албатта, жамоа учун ҳимоя марказида Рубен Диаш ва Жон Стоунз тандемининг бўлиши жуда муҳим. Уларнинг ҳар иккиси ҳам жамоа ўйинини мустаҳкамлашда катта аҳамиятга эга ўйинчилар ҳисобланади.
Лекин биз фақат уларга қараб, тўхтаб қолмаймиз. Бизда марказий ҳимояда яхши ўйнай оладиган Йошко Гвардиол, Мануэль Аканжи, Натан Аке ва ёш истеъдод эгаси Абдуқодир Ҳусанов ҳам бор. Уларнинг бари клуб учун бир хил даражада муҳим футболчилардир.
Мен уларнинг ҳар бирига ишонаман ва уларнинг сафимизда экани биз учун жуда катта имкониятларни очади.
Мавсум бошидаёқ менда фақат биргина истак бор ва у ҳам бўлса, жамоам саломатлиги. Жароҳатлар бўлиши табиий, лекин улар ўтган мавсумдагидек кўпайиб кетмаслиги муҳим. Мен учун энг асосийси – футболчилар майдонга чиқиб, рақобатлашишга қодир бўлсин, - деди Хосеп Гвардиола.
Эслатиб ўтамиз, Абдуқодир Ҳусанов 2025 йилнинг 20 январь куни Франциянинг “Ланс” клубидан “Манчестер Сити”га кўчиб ўтди. 21 ёшли легионеримиз айни пайтда жамоадаги энг ёш марказий ҳимоячи ҳисобланади. Хосеп Гвардиола ёзги трансферлар даврида ўзбек футболчисини бошқа клубларга бермасдан, жамоада олиб қолишга қарор қилди.
Фикрлар