12 йил аввал худди шу санада ёхуд "Қизилқум" - "Андижон" учрашуви олдидан

Chery Tigo 7 PRO

 

Бугун Қаршидаги “Марказий” стадионда “Андижон” жамоаси Суперлиганинг 11-турида “Қизилқум”га қарши майдонга тушади.

Айни пайтда Жамшид Саидов устозлигидаги "Қизилқум" ҳисобида 10 та турдан сўнг 10 очко тўплаб, 10-ўринни эгаллаб турибди. "Андижон" бўлса, 14 очко жамғариб 6-поғонада бормоқда. 8 та ўйиндан бери ғалаба қозона олмаётган Навоий жамоасини олдинда жиддий учрашув кутяпти. Негаки, "Андижон" ҳали бу мавсумда сафардаги баҳсларда ютқазгани йўқ. Бунинг устига Александр Хомяков жамоаси учун ҳам ғалаба зарур. Чунки охирги 5 та турдан бери "Бургутлар" ҳам ютгани йўқ. Демак, майдонда шиддатли ва кескин ўйин гувоҳи бўламиз. 

Ушбу клубларнинг ўйинлар тарихига тўхталсак, шу пайтгача чемпионатда 38 бор куч синашишган. “Қизилқум”да 18, “Андижон”да эса 14 та ғалаба бор. 6 та учрашувда дуранг қайд этилган. Тўплар нисбати 59\49 навоийликлар фойдасига. Жамоаларнинг чемпионатдаги биринчи тўқнашуви 2000 йилда рўй берган. Ўшанда "Қизилқум" майдонидаги учрашувда мезбонлар 2:0 ҳисобида устун келган. 

Ёдингизда бўлса, ўтган йилги мавсумда “Андижон”  Фарғонадаги учрашувда 2:0 ҳисобида ғалаба қозонган. Иккинчи даврадаги баҳсда эса навоийликлар ўз уйида 3:0 ҳисобида устун келган.

Қизиқ факт: “Андижон” сафарда “Қизилқум”ни бир марта 2012 йилги чемпионатда мағлуб этган. Ўшанда "Бургутлар" 1:2 ҳисобида муваффақиятга эришган. Ўша ғалаба 2012 йилнинг 15 июнь куни юз берган. 12 йилдан сўнг жамоалар яна 15 июнь кунида тўқнаш келадилар. Умуман айтганда, “Андижон” июнь ойида шу пайтгача “Қизилқум”га қарши иккита марта ўйнаган ва иккаласида ҳам ғолиб чиққан.

Ҳозир ҳам июнь ойи ва айнан 15-сана. Агар юқоридаги статистикага эътибор қиладиган бўлсак, у ҳолда "Андижон" ғалаба қозониши керак, шундайми? Албатта, булар статистик рақамлар ва ўзига хос қизиқ фактлардир. Барчаси майдонда ҳал бўлади. 

 

Фикрлар

Фикр қолдириш учун авторизациядан ўтинг!