Ҳусанов ҳақида қизиқ фактлар маълум қилинди

Ўзбекистоннинг бугунги кундаги энг машҳур юлдузига айланган Абдуқодир Ҳусанов фаолияти ва ҳаёти ҳақида қизиқарли фактлар эълон қилинди.

Демак, 22 ёшли футболчи ҳақидаги маълумотлар билан танишинг:

2011 йилда Абдуқодир Тошкентнинг “Бунёдкор” академиясига қабул қилинди ва 2021 йилгача шу ерда таҳсил олди.

Футболчининг турли ёш тоифаларидаги дастлабки мураббийлари Сергей Чигодаев, Акмал Рисқуллаев ва Алишер Иброҳимов, шунингдек, унинг отаси бўлган.

Қизиғи шундаки, “Бунёдкор”да истиқболли ҳимоячининг салоҳияти етарлича баҳоланмаган. Шу сабабли у профессионал фаолиятини хорижда бошлашга қарор қилди.

2022 йил баҳорининг бошида Абдуқодир Ҳусанов Беларуснинг “Энергетик-БГУ” клубига қўшилди. Ҳозир ушбу жамоа “СКА-1938” номи билан фаолият юритади.

Мавсум якунида жамоа Беларусь олий лигасида кумуш медалларга эга чиқди. Ҳусанов эса чемпионатнинг рамзий терма жамоасидан жой олди ва шу орқали кучли чемпионатлар скаутларининг эътиборини тортди.

2023 йил ёзида ўзбекистонлик футболчи Франциянинг “Ланс” клубига ўтди. Унинг трансфери янги клубига тахминан 100 минг еврога тушди.

Ўша йил кузида Абдуқодир Ҳусанов Чемпионлар лигасида дебют қилди. Франциядаги ўйинлари ёш ҳимоячининг энг юқори даражадаги футболга тайёр эканини кўрсатди. Кучлироқ жамоага ўтиши эса вақт масаласига айланди.

2025 йил январь ойида Ҳусановнинг янги клуби аниқ бўлди. Англия футболи грандларидан “Манчестер Сити” уни “Ланс”дан сотиб олиш учун 40 миллион евро тўлади. Бонуслар билан трансфер суммаси 50 миллион еврогача етиши белгиланди.

“Манчестер Сити” таркибида Абдуқодир Ҳусанов Англия кубоги ва Лига кубогида ғолиб чиқди. Айни пайтда у жамоанинг муҳим футболчиларидан бири бўлиб, асосий таркибда мунтазам майдонга тушиб келмоқда.

Transfermarkt маълумотларига кўра, 2026 йил сентябрь ҳолатида ҳимоячининг барча турнирлардаги клуб статистикаси қуйидагича:

• 2022–2023 –  “Энергетик-БГУ”: 37 та учрашув, 4 та гол.
• 2023–2025 – “Ланс”: 31 та учрашув, 0 та гол.
• 2025 йилдан – “Манчестер Сити”: 53 та учрашув, 1 та гол.

Ҳусанов Ўзбекистон ёшлар терма жамоасида 2020 йилда дебют қилган. Ҳимоячи  U-17, U-19, U-20 ва U-23 терма жамоалари сафида ҳаракат қилиб, жами 26 та учрашувда иштирок этган. Бу статистикага Париждаги Олимпиададаги 3 та учрашув ҳам киради.

2023 йилдан Абдуқодир Ҳусанов Ўзбекистон миллий терма жамоаси сафида ўйнаб келмоқда. Ҳозирча у терма жамоа сафида 32 та учрашув ўтказган.

2026 йил ёзида ҳимоячи Ўзбекистон учун тарихдаги биринчи жаҳон чемпионатида иштирок этди.

Ҳусановнинг асосий устунликларидан бири – юқори тезлиги. 2026 йилги Жаҳон чемпионатида у 36,5 км/соат тезликка эришган ва бу мусобақадаги энг юқори кўрсаткичлардан бири бўлган.

Ҳимоячи яккама-якка курашларда ҳам ишончли ҳаракат қилади. У ҳаводаги ва ердаги курашларда ғалаба қозониш фоизи бўйича мунтазам равишда юқори кўрсаткичларни қайд этади.

Шунингдек, Ҳусановнинг кучли жиҳатлари қаторига ўйинни яхши ўқиши ва пас бериш маданияти ҳам киради.

22 ёшга келиб Абдуқодир Ҳусанов бир қатор қуйидаги жамоавий ва шахсий мукофотларни қўлга киритди:

2026 йилги жаҳон чемпионатига йўлланмани қўлга киритиш Ҳусанов ва унинг терма жамоадаги шерикларига давлатнинг фахрий мукофоти – “Ўзбекистон ифтихори” унвонини олиб келди.

Жаҳон чемпионатидан кейин клуб футболчи билан шартномани янгилади. Янги шартнома футболчининг молиявий шартларини сезиларли даражада яхшилади. Томонлар ҳамкорликни 2031 йилгача узайтирди, шунингдек, шартномани яна узайтириш имконияти ҳам назарда тутилди.

“Манчестер Сити” билан янги шартнома шартларига кўра, ҳимоячининг маоши деярли икки баравар ошди: йилига 2,6–3 миллион фунт стерлингдан 5,2 миллион фунт стерлинггача. Бу сумма бонуслардан олинадиган даромадларни ҳисобга олмайди.

Таққослаш учун, Беларусда Ҳусановнинг расмий маоши ойига 200 доллардан ошмаган. “Ланс”да эса унинг йиллик маоши солиқлар тўлангунига қадар 140 минг евро бўлган. Шу сабабли Англияга кўчиб ўтиш Ҳусанов учун нафақат профессионал фаолиятида, балки молиявий жиҳатдан ҳам катта ўсиш бўлган.

Роналду ёки мураббий: айбдор ким?

“Башакшеҳир” Шомуродовга эркинлик беради

Ҳусановга “Манчестер Сити”дан муносабат келди