125 миллион еврога олинган ўйинчи “бир тийинлик” фойда бермади

Англиянинг амалдаги чемпиони “Ливерпуль” Премьер-лигада “Кристал Пэлас”га ва Европа Чемпионлар лигаси умумий босқич иккинчи турида “Галатасарой”га имкониятни бой берганидан кейин мухлису мутахассислар томонидан танқидга нишонга бўляпти.

Энг кўп эътирозга сабаб бўлаётган ўйинчилардан бири Флориан Вирц бўляпти. Ливерпулликлар 22 ёшли футболчини олиш учун ёзда “Байер”га 125 миллион евро тўлаган эди. Бу сумма трансфер амалга оширилган пайтда АПЛнинг янги рекорди сифатида қайд этилган.

“Ливерпуль” етакчисига айланиши кутилган Флориан Вирцнинг инглиз футболига мослашиши қийин кечмоқда. У чемпионатнинг олтита ва халқаро турнирнинг иккита учрашувида бирорта самарали ҳаракатни амалга ошира олгани йўқ.

Вирцнинг клубдаги дебют учрашуви Англия Суперкубогига тўғри келган ва ўшанда плеймейкер битта голли пас узатган эди. Шундан бери Вирц қаторасига саккизта ўйинни “қуруқ” ўтказди.

Айни пайтда аксарият экспертлар Флориан Вирц асосий таркибда ўйнашга лойиқ эмаслигини таъкидлаб, Арне Слотни уни захирага ўтқазишга чорлаяпти.