9 та ўйинчидан қутилган суперклуб 6 футболчини трансферга қўйди

Англия Премьер-лигасида юқори ўринлар учун курашишни мақсад қилгагн “Челси” ёзги трансферлар даврида таркибида жиддий ўзгаришларни амалга оширмоқда.

Янгича форматда ўтказилган клублар ўртасидаги жаҳон чемпионати ғолиби бўлган Энцо Мареска жамоаси ёзда олти нафар янги ўйинчи олди. Таркиб Жейми Гиттенс, Жоао Педро, Лиам Делап, Йоррел Хато, Эстевао Виллиан ва Дариу Эссугу билан кучайтирилди.

The Mirror нашрининг ёзишича, “аристократлар” ортиқча ўйинчилардан қутилиш мақсадида яна олти нафар футболчини трансферга қўйди. Улар тез орада “Стэмфорд Бридж”ни тарк этиши талаб этилади.

Маълумотларга қараганда, “Челси”га бундан буён Николас Жексон, Кристофер Нкунку, Бен Чилуэлл, Аксель Дисаси, Рахим Стерлинг ва Ренату Вейганинг хизмати керак бўлмайди. Бу ўйинчиларнинг аксарияти яқинда жамоанинг асосий фигуралари эди.

“Челси” ёзда тўққизта футболчини қўйиб юборган эди. Энцо Мареска талабига жавоб бермаган Нони Мадуэке, Кепа Аррисабалага, Кирнан Дьюсбери-Холл, Жоау Феликс, Лесли Угочукву, Армандо Броя, Жорже Петрович, Маркус Беттинелли ва Матис Амугу бошқа клубларга ўтиб кетди.

Айни пайтда клуб мутасаддилари яна иккита ўйинчини олиш бўйича иш олиб бормоқда. Сўнгги хабарларга кўра, “Челси”га “Манчестер Юнайтед”дан Алехандро Гарначо ва “Лейпциг”дан Хави Симонс келиши кутиляпти.