Ана холос! Фозил Мусаев энди Иньестага қарши ўйнаши мумкин

Каталониянинг “Барселона” клуби ярим ҳимоячиси Андрес Иньеста фаолиятини Япония чемпионатида давом эттирадиган бўлди.

ESPN тарқатган хабарга кўра 33 ёшли испаниялик футболчи “Виссел Кобе” клуби билан келишувга эришган. Унга кўра Иньеста япон жамоаси билан 3 йиллик шартнома имзолайди. Унинг йиллик маоши эса 30 млн долларни ташкил этади.

Хабарларга қараганда ушбу трансферда “Виссел Кобе” хўжайини Хироши Микитанинг роли жуда катта бўлди. Таъкидлаш керакки, Микитани “Барселона”нинг айни дамдаги титул ҳомийси ҳисобланган Rakuten компаниясининг бош директори ҳисобланади.

Эслатиб ўтамиз, “Виссел Кобе” чемпионатнинг ўтказилган 13та туридан сўнг 10-поғонада бормоқда. Ушбу жамоада шунингдек Лукас Подольски ҳам тўп суради.

Маълумот учун, Иньеста кўчиб ўтадиган чемпионатнинг “Жубило Ивата” клубида ҳамюртимиз Фозил Мусаев ҳаракат қилади.

Фикрлар

Фикр қолдириш учун авторизациядан ўтинг!