Россия жаҳон чемпионатига чиққан Ўзбекистонга “вызов” ташлади!

Ўзбекистон миллий терма жамоасининг ўз тарихида илк бор жаҳон чемпионатига чиққани ўзбек халқи учун йил воқеаси бўлди.

Футболчиларимизнинг 2026 йили АҚШ, Канада ва Мексика майдонларида бўладиган мундиалда иштирок этишига турли мамлакатлардан муносабат бўлмоқда. Хусусан, Ўзбекистон миллий терма жамоасининг икки футболчиси – Аббосбек Файзуллаев ва Рустам Ашурматов ўйнайдиган Россияда ҳам бу муваффақият борасида кўп фикр билдириляпти.

Sports.uz портали Россия футбол жамоатчилиги вакилларининг Ўзбекистон миллий терма жамоаси бўйича билдирган фикр-мулоҳазаларини ўзбекистонлик футбол мухлислари эътиборига ҳавола қилади.

Вячеслав Колосков, Россия футбол иттифоқи фахрий президенти:

Россия терма жамоаси Ўзбекистон билан ўйнаса яхши бўларди. Ўзбек футболчиларнинг кейинги пайтдаги муваффақиятлари фонида бу ўйин бизнинг терма жамоамиз учун жиддий синов бўлиб, хизмат қилади.

Россия футбол иттифоқи бу ўйинни ташкил қилиш билан шуғулланиши мумкин. Бу жуда яхши ғоядек кўринмоқда.

(Ўзбекистон ва Россия терма жамоалари 2022 йилнинг ноябрида ўзаро куч синашган ва ўша ўртоқлик учрашувида ҳисоб очилмаган эди, - sports.uz)

Валерий Кечинов, “Пахтакор”, “Спартак” ва Россия терма жамоаси собиқ футболчиси:

Жаҳон чемпионатига чиқиш, Ўзбекистон учун жуда катта муваффақият, улар буни жуда узоқ кутишган эди. Турли йилларда бунинг учун жуда яхши имкониятлар бўлган, лекин ўхшамай келаётганди. Ҳозир ҳаммаси ўз ўрнида – жуда кучли ва талантли футболчилар бор, балки саралашда жуда кучли рақиблар дуч келмагандир. Шунга қарамай, вазифа бажарилди ва Ўзбекистон илк бор жаҳон чемпионатида ўйнайди.

Ўзбекистонда ҳар доим футбол оммавий бўлган. Иқлим йил давомида тўп тепиш имконини беради. Болалар футбол билан яшайди. Энди бу ҳолат янада кўпаяди. Бунақа воқеаларнинг содир бўлиши ҳар доим мамлакат футболига ижобий таъсир қилади.

Александр Хомяков, “Машъал”, “Андижон”, “Бухоро”, “Сўғдиёна”да ишлаган россиялик мураббий:

- Мен Ўзбекистон терма жамоаси илк бор жаҳон чемпионатига чиққанидан хурсандман ва бундан фахрланаман. Бу нафақат футболчиларнинг, балки мураббийлар ва федерациянинг ҳам ютуғи. Ҳозир бутун мамлакат байрам оғушида.

Давлат футболни ҳар томонлама қўллаб-қувватлаяпти. Инфратузилма ҳам зўр ривожланяпти: янги футбол майдонлари, мактаблари, академиялари пайдо бўляпти.

Футбол – мамлакатдаги энг севимли ўйинлардан. Футбол ўйнашни биладиган, натижа қила оладиган ёшлар етишиб чиқмоқда. Бу омиллар бирлашиб, жуда катта туртки бўляпти.

Эслатиб ўтамиз, АҚШ, Канада ва Мексика биргаликда мезбонлик қиладиган навбатдаги жаҳон чемпионати 2026 йилнинг 11 июнидан 19 июлигача бўшлиб ўтади.

Ўзбекистондек мундиалга чиқиш учун футболдан бегона одамларни йўқотиш керак!

Кимлар ўйнаяпти? Ўзбекистон футболчиларига эътибор беринг!