“Бухоро” стадионида таъмирталаб ўриндиқлар янгиланмоқда

ЎФА ва ЎзПФЛ томонидан ўтказиладиган мусобақаларда иштирок этувчи футбол клубларини лицензиялаш ва профессионал футбол клуби мақомини белгилаш бўйича регламент” ишлаб чиқилгани ва унинг ЎФА Ижроқўми бюроси томонидан тасдиқлангани ҳақида хабарингиз бор.

Айнан шу регламентга мувофиқ клубларни лицензиялаш бўйича Ишчи гуруҳи 5-6 декабрь кунлари “Бухоро” футбол клубида белгиланган талабларнинг бажарилиши юзасидан мониторинг ўтказган эди.

Ўрганишлар жараёнида футбол клуби стадиони майдонининг талаб даражасида эмаслиги, шунингдек стадиондаги ўриндиқлар таъмирталаб ҳолатга келиб қолгани каби айрим камчиликлар аниқланган эди.

Шу боисдан айни пайтда “Бухоро” спорт мажмуасида қизғин иш олиб борилмоқда. Клуб майдон ҳолатини яхшилаш борасида малакали ҳодимларни ишга жалб этди. Стадионда дренаж суғориш тизими ўрнатиш мўлжалланмоқда. Қолаверса, аллақачон эски таъмирталаб бўлиб қолган ўриндиқлар янгиларига алмаштирила бошланди.

Шунингдек, бироз пардозталаб ҳолатга келиб қолган кийим алмаштириш хоналари ҳам косметик таъмирдан ўтказилмоқда.