Гаттузо: "Интер" ғалабага биздан кўра муносиброқ эди

“Милан” бош мураббийи Женнаро Гаттузо кеча А Сериянинг 9-тури доирасида бўлиб ўтган “Интер”га (1:0) қарши баҳсда учралган мағлубиятдан сўнг ўз фикрларини билдириб ўтди.

“Интер” шубҳасиз бугун ғалабага биздан кўра кўпроқ муносиб эди. Бизда гол уриш учун имкониятлар бўлди, аммо рақибларимизда бундай вазиятлар кўпроқ бўлди, бу аниқ. Агар ўйин 0:0 ҳисобида якунланганида, бу биз учун ижобий натижа бўларди.

Бугун жисмоний кучга асосланган футбол ўйнашимизга тўғри келди, биз эса буни ёқтирмаймиз. Аммо, шундай бўлсада ёмон ўйнамадик. Биз қарши ҳужумларда янада яхшироқ ўйнашимиз мумкин эди.

Мавсум бошидан буён ҳали бирорта ўйинда 90 дақиқа мукаммал ҳимояланмаган эдик. Бироқ, рақибнинг кўплаб стандарт вазиятларга эга бўлганига қарамай, бу сафар биз ушбу ишни яхши уддаладик”, - дейди Гаттузо.