Купер "бирровчи" мураббийми? Ёхуд нега Осиё кубогига ёш футболчилар билан бормадик?

Хабарингиз бор шу кунларда Бирлашган Араб Амирликларида Осиё кубоги мусобақаси айни авж палласига чиқди. Бироқ, минг афсуслар бўлсинки миллий терма жамоамиз мусобақадаги юришини аллақачон якунлади. Ушбу муваффақиятсизликдан сўнг кимлардир Эктор Купернинг нотўғри тактика танлагани, унинг қарашлари бизнинг жамоага мос келмаслигини таъкидлашмоқда. Балким бу гапларда ҳам жон бордир. Аммо, биз бугун бошқа мавзуга эътиборингизни қаратмоқчимиз.

Қуйида Осиё кубоги чорак финалига чиққан 8та терма жамоанинг ўртача ёши ва таркибидаги энг ёш футболчилар билан таништириб ўтамиз:

Вьетнам – ўртача ёши 23,8

Энг ёш футболчиси – Ван Хау Доан 19 ёш

Жанубий Корея – ўртача ёши 27,1

Энг ёш футболчиси – Сон Ву Ли 21 ёш

Эрон – ўртача ёши 27,6

Энг ёш футболчиси – Мажид Ҳусайни 22 ёш

Япония – ўртача ёши 27,6

Энг ёш футболчиси – Такехиро Томиясу, Доан Рицу – иккаласи ҳам 20 ёш

Австралия – ўртача ёши 27,3

Энг ёш футболчиси – Алекс Герсбах 21 ёш

Хитой – ўртача ёши 29,8

Энг ёш футболчиси – Веи Шихао 23 ёш

БАА – ўртача ёши 28,3

Энг ёш футболчиси – Ҳалифа Алҳаммади 20 ёш

Қатар – ўртача ёши 25,2

Энг ёш футболчиси – Муҳаммад Ҳолид 18 ёш

ЎЗБЕКИСТОН  – ўртача ёши 27,5

Энг ёш футболчиси – Отабек Шукуров, Одил Ҳамробеков, Жавоҳир Сиддиқов – барчаси 22 ёш.

Кўриб турганингиздек турнир кашфиёти бўлган Вьетнам терма жамоаси 1/4 финалда иштирок этган терма жамоалар орасида энг ёш таркибга эга. Улар сал қолса японияликларни уйига равона қилишлари ҳам мумкин эди.

Бундан ташқари, мусобақада рақиб дарвозасини энг кўп ишғол этган Қатар терма жамоаси ҳам анча ёш таркибга эга. Эътиборлиси, испаниялик мутахассис Феликс Санчес қўрқмасдан қитъа чемпионатига эндигина 18 ёшни қарши олган Муҳаммад Ҳолидни ҳам олиб келгани тақсинга сазовор. Айтиш мумкинки, Қатар мана шундай ёш таркиб билан ҳам Осиё кубогида ажойиб ўйинлар кўрсатаётганини инобатга олсак, улар ўз уйида бўладиган мундиалда ҳам муносиб иштирок эта олишади.

Бироқ, бу босқичга аранг етиб келган Хитой ва Бирлашган Араб Амирликлари терма жамоаси футболчиларининг ёши анча каттароқ. Балким, шу сабабли ҳам улар мухлислари кутган ўйинларни намойиш эта олишмаётган бўлиши мумкин. Бунга ушбу икки терма жамоада аллақачон “номери” ўтиб бўлган икки мураббий – Марчелло Липпи ва Альберто Заккеронининг фаолият олиб бораётгани асосий сабаб бўлиши мумкин. Чунки, бу каби мутахассислар Осиёга фақат мўмай пул ишлаш мақсадида келишади. Улар учун терма жамоанинг келажаги заррача қизиқ эмас. Улар 30 ёшли футболчилар билан ишлашдан уялишмайди. Агар натижа ўхшамаса, улар ҳеч нарса ютқазишмайди. Чунки, улар Осиёда ўзларини кўрсатган тақдирида ҳам уларни Европа грандлари энди ишга таклиф қилишмайди.

Балким Эрон, Япония, Жанубий Корея ва Австралия терма жамоаларининг ёши деярли бизнинг термамизники билан бир ҳил деб айтарсиз. Лекин, ўша терма жамоанинг аксарият футболчилари деярли Европа кучли бешлик чемпионатларида тўп суришини биласизми? Агар бизнинг терма жамоада ҳам АПЛ ёки Ла Лига, А Серия ёки Бундеслигада тўп сурадиган футболчилар бўлишганида, ёши 40да бўлса ҳам терма жамоага жалб этилишига ҳеч қандай шубҳа йўқ.

Яна бир томони ўша ёши бизникилар билан тенглиги айтилаётган Австралия, Япония ва Жанубий Корея терма жамоалари таркибида 20-21 ёшли футболчилар ҳам борлигини унутмаслик лозим. Чунки, улар ҳозирги мусобақа билан бир қаторда келажакни ҳам ўйлашмоқда.

Ўзбекистон терма жамоасига келган Эктор Купер ҳам аслида “бирровчи” мураббийлардан ҳисобланади. Боиси, аргентиналик мутахассис ўзининг мураббийлик фаолияти давомида бир жамоада кўпи билан 2 йил ишлаган. Албатта, Миср терма жамоаси бундан мустасно. Купер эхромлар юртида 3 йил фаолият олиб борди. Айтиш мумкинки Миср терма жамоаси Куперга қадар ҳам “қора қитъа”нинг грандлари қаторида тилга олинар эди. Аммо, қандайдир омадсизликлар туфайли 28 йилдан буён мундиал йўлланмасини қўлга кирита олмай келаётганди. Купернинг бахтига у келган давр Мисрда Муҳаммад Салоҳдек футболчининг порлаган даврга тўғри келиб қолди ва мисрликлар узоқ кутилган натижани қайд этишди. Албатта, Купернинг Мисрда 3 йил ишлашига ҳам бир томондан Салоҳ ва унинг юлдуз жамоадошлари сабаб бўлган. Чунки, қайси мураббий натижалар зўр бўлиб турган ва қўл остида дунёнинг энг яхши футболчиларидан бири тўп сураётган пайтда жамоадан кетишни хоҳлайди? Табиийки раҳбарият ҳам ижобий натижалардан сўнг уни истеъфога чиқармаган. Шу тариқа у шартномаси якунига қадар Мисрда қолди. Аммо, ЖЧ-2018да унинг терма жамоаси шарманда бўлганини бутун дунё кўрди. Хатто, кўп ҳолларда биздан енгиладиган Саудия Арабистони ҳам улардан устун келди. Шундан сўнг Миср футболи раҳбарияти Купер билан шартномани узайтиришни хоҳламади, ҳар холда шуниси ҳақиқатга яқинроқ. Бу орада эса ўзбекистонликлардан “ёғли” таклиф олган жаноб Купер ҳеч қандай иккиланишларсиз юртимизга ташриф буюрди.

Айтмоқчи бўлганимиз, жаноб Купер ростан ҳам Ўзбекистонни жаҳон чемпионатига олиб чиқиш учун келган бўлса, нега унда таркибимиз асосини ёши ўтиб қолган футболчилардан тузди? Ҳар ҳолда бизда боя айтганимдек кучли бешлик чемпионатларида тўп сурадиган футболчилар йўқку? Осиё кубогида ғолиб чиқолмаслигимиз аввалдан маълум эди. Шундай экан нега ушбу мусобақада Ироқ, Вьетнам ва Қатар сингари ёш футболчиларни синовдан ўтказмадик? Агар Купер Осиё кубогига ёшларни олиб борган тақдирда ҳам гуруҳдан чиқа олишимизга ҳеч қандай шубҳа йўқ.

Хўш, қачонгача Одил Аҳмедов ёки Нестеровга ишонамиз? Қачон уларнинг ўрини боса оладиган футболчиларни етиштириб чиқарамиз? Купер иш бошлагандан буён Ўзбекистон ўсмирлар терма жамоасидаги футболчиларни ҳам кўздан кечирганмикан? Ахир, 17-18 ёшли футболчилар орасида ҳеч бўлмаганда 2 ёки 3 нафар иқтидор эгасини танлаб олиб, Осиё кубогида захирадан бўлсада майдонга тушириб, уларни катта ўйинларда тоблаши мумкин эдику?!

Оддий мисол, Ироқ терма жамоасининг Осиё кубогидаги асосий ҳужумчиси сифатида ҳаракат қилган Моҳанад Али эндигина 18 ёшда. Шундан келиб чиқиб айтиш мумкинки, у  яна камида 15 йил терма жамоасига ёрдам бера олади. Хўш, биз қачон терма жамоамиз сафида 18 ёшли футболчини кўрамиз? Албатта, бизнинг мураббийлар ёш футболчиларни майдонга тушириб, таваккал қилишдан қўрқишади. Лекин, Куперчи? Ахир у хорижликку! Аслида у бизнинг футболни ёшартириши керак эмасми?

Энди бизни олдинда ЖЧ-2022 саралаши кутмоқда. Купер саралашда ҳам яна шу терма жамоа билан иштирок этмоқчими? Назаримда Купер ҳаммасини нолдан бошлаши керак. Майли, 2-3 нафар етакчилар сақланиб қолсин. Бунга қарши эмасмиз, аммо, Купер энди ёш футболчиларни қидириб, уларни тарбиялаши керак. Агар Ўзбекистонда ўзидан яхши ном қолдиришни хоҳласа шундай қилиши шарт! Агар биз ҳам 20-24 ёшли футболчилар билан мундиалга борсак, уларнинг аксарияти биз орзу қилгандек Европанинг кучли клублари сафига ўтишлари мумкин.