“Ливерпуль” янги мавсумда қандай кўриниш ҳосил қилади?

 

Ўтган мавсум Чемпионлар Лигаси финалчиси “Ливерпуль” қайноқ ёзги трансферларни амалга оширишга улгурди. “Қизиллар” таркибга ўз позицияларининг энг моҳир усталарини жалб қилди. Бироқ улар Юрген Клоппнинг режаларига қай тариқа мос тушиши мумкин. Қуйида шу ҳақида фикр юритамиз.

“Ливерпуль” сўнгги трансфер – дарвозабон Алиссонни қўшиб олиб таркибни деярли оптимал ҳолатга келтира олди. Бразилиялик дарвозабон 85 миллион доллар эвазига “туманли Альбион”га кўчиб ўтди ва футбол тарихидаги энг қиммат дарвозабонга айланди. Мерсисайдликлар бу вақтга келиб янги аъзолари учун 150 миллион фунтдан зиёд маблағни сарфлаб бўлди.

Алиссон Наби Кейта, Фабиньо ва Шакирилардан кейин янги мавсумдан “Энфильд”да тўп суради. Хўш, бундай кучли чарм тўп усталари келиши оқибатида қайси футболчилар ўз келажаги борасида қайғуришни бошлаши керак. 2018-19-йилги мавсумда “Ливерпуль” қуйидаги ўйин схемаларида ҳаракат қилиши мумкин.

4-3-3

Энг оптимал ўйин тизими сифатида 4-3-3 кўрилмоқда. Зеро, бундай схемада немис мураббийи кўп муваффақиятларга эришган. Фақатгина битта савол туғилади. Бу ҳолатда қайси асосий таркиб футболчилари “захирага михланади”?

Катта эҳтимол билан Хендерсон жамоа сардори бўлиб қолади. Унинг таянч ярим ҳимоячилик вазифасига Фабиньо таҳдид солиши мумкин. Кейта эса асосий таркибдан Вейналдум ёки Милнерни сиқиб чиқариши кутилмоқда. Эмре Жан “Ювентус”га йўл олди, Окслейд-Чемберлен эса тиззасидан олган жароҳати сабаб мавсумнинг кўп қисмини майдондан ташқарида ўтказди. Адам Лаллана эса асосий таркибга қайтиши учун яна бошидан бошлашига тўғри келади. Ҳужум ва ҳимоя чизиқлари ўзгармасдан қолиши муқаррар.

4-2-3-1

Яна бир бошқа муқобил вариант сифатида 4-2-3-1 ни айтишимиз мумкин. Бунда Клопп нақ тўрт ҳужумчи билан ҳаракат қилиши мумкин. У бундай вариантда Премьер Лиганинг сўнгги турида “Брайтон”га қарши ҳаракат қилган эди.

Кейта ва Фабиньолар эса майдон марказида кучли жуфтликни ҳосил қилиши мумкин. Лаллана (ёки Шакири, ҳатто Даниель Старридж) эса Фирминьонинг ортида “алдамчи ўнлик”ни ташкил қилиши мумкин.

4-4-2

Балки бу вариантни ҳам кўрармиз. “Ливерпуль” Шакири билан бундай услубда ҳам ўйнаб кўриши мумкин. Бунда Фирминьо ва Салоҳ (ёки Мане) ўзларини марказий ҳужумда синаб кўришлари мумкин бўлади. Бундай услубда “қизиллар” кўпроқ кучсиз рақибларга қарши уй учрашувларида бемалол ҳаракат қилса бўлади.

Кўриб турганимиздек, мерсисайдликларнинг янги мавсумдаги ўйин услубларида ўзгариш асосан ярим ҳимоя чизиғида рўй бериши мумкин. Катта пул эвазига олиб келинган Кейта ва Фабиньоларни албатта захирада ўйнатиш учун жалб қилгани йўқ. Дарвозани эса “ҳурмача қилиқлари” билан Чемпионлар Лигасида мағлубиятга сабабчи бўлган Кариус ўз жойини дунёнинг энг қиммат дарвозабонига бўшатиб беради. Ўзгармасдан қолаётган ёки кам ўзгариш кутилаётган чизиқ ҳимоя бўлади. Робертсон, Ван Дейк, Ловрен ва Трент Александр-Арнольд ўтган мавсумда кучли ҳимоя чизиқларидан бирини ҳосил қилишди. Ҳужумда эса Мане, Фирминьо ва Муҳаммад Салоҳлар яна Европани забт этиш учун уриниб кўради. Ҳар тарафлама “қизиллар” сифатли футболчилар билан таркибни тўлдиргани фақатгина уларнинг фойдасига ишлайди.

Эркинжон Ғайбуллаев тайёрлади.

 

 

Фикрлар

Фикр қолдириш учун авторизациядан ўтинг!