"Manchester Yunayted" Errera bilan kelisha olmayapti

"Manchester Yunayted" klubi rahbariyati jamoa yarim himoyachisi Ander Errera bilan shartnomani uzaytirish borasida kelisha olmayapti. Bu haqda Daily Mail nashri xabar tarqatmoqda.

Yuqoridagi manbaaga ko‘ra “qizil iblislar”ning yangi kelishuvga ko‘ra taklif qilayotgan maoshi 29 yoshli ispaniyalik futbolchiga ma’qul kelmayapti. Gap shundaki, Erreraning ayni damdagi yillik maoshi 4,4 mln evroni tashkil etadi va MYu rahbariyati ushbu maoshni biroz oshirishni taklif qilmoqda.

Aytish lozimki, Erreraning MYu bilan amaldagi shartnomasi joriy mavsum yakunida o‘z nihoyasiga etadi va u shundan so‘ng erkin agent sifatida istagan jamoasiga tekinga ko‘chib o‘tishi mumkin. Bundan avvalroq unga o‘zining sobiq jamoasi hisoblangan “Atletik” Bilbaodan qiziqishlar bo‘layotgani haqida xabarlar tarqalgan edi.

Ma’lumot uchun, Errera “Manchester Yunayted” safida 2014 yildan buyon to‘p surib kelmoqda. U o‘tgan davr mobaynida jami 169ta o‘yinda maydonga tushib, o‘z hisobiga 17ta gol hamda 24ta golli uzatma yozdirib qo‘yishga erishgan.